Папуляцыя кляшчоў у Беларусі за першыя месяцы 2016 года ў параўнанні з аналагічным перыядам мінулага года павялічылася ў два разы, паведаміў загадчык аддзела эпідэміялогіі Рэспубліканскага цэнтра гігіены, эпідэміялогіі і грамадскага здароўя Уладзімір Пашковіч 18 мая на прэс-канферэнцыі ў Мінску.
Росту папуляцыі, на яго думку, спрыяе глабальнае пацяпленне. «У Беларусі ўсталяваліся мяккая зіма і ранняя вясна, сярэдняя тэмпература летась перавышала норму на 2,7 градуса, таму кляшчы добра захоўваюцца падчас зімовай спячкі, менш гінуць, а надвор'е спрыяе іх развіццю і размнажэнню», — сказаў Пашковіч.
Паводле слоў спецыяліста, за два месяцы гэтага года з прычыны ўкусаў кляшчоў да медыкаў звярнуліся прыблізна 2,3 тыс. чалавек, прыкладна 700 з іх — дзеці. Найбольшая колькасць зваротаў зафіксаваныя ў Брэсцкай, Гродзенскай абласцях і Мінску.
Летась, як паказалі энтамалагічныя даследаванні, колькасць кляшчоў у беларускай прыродзе вырасла на 28%. Нягледзячы на гэта, лік зваротаў у сувязі з укусамі быў на 15% меншым, чым у 2014 годзе. На думку гігіеніста, гэтаму спрыяюць меры прафілактыкі па барацьбе з кляшчамі.
Пашковіч паведаміў, што клешч жыве ў траве і пад лісцем, пры гэтым вышэй за метр па раслінах не падымаецца. Пік актыўнасці кляшчоў — вясна, калі тэмпература павышаецца да плюс 5°С, і восень.
Адказваючы на пытанні журналістаў, Пашковіч выказаў сумнеў у эфектыўнасці здачы на аналіз знятага з цела кляшча. «Здаваць кляшча на аналіз і чакаць выніку — гэта страта часу, — лічыць ён. — Больш плённа адразу пасля ўкусу аднакратна прыняць дзве капсулы антыбіётыка, напрыклад даксіцыкліну, што забяспечвае поўную прафілактыку захворвання на Лайм-барэліёз».
Ён падкрэсліў, што гаворка ідзе толькі пра дарослых, дзяцей да доктара трэба весці ў любым выпадку.
Што да энцэфаліту, то неабходна на працягу месяца пасля ўкусу назіраць за станам здароўя. «Калі ў вас павысілася тэмпература, вас пачало трэсці, адразу ідзіце да доктара і кажыце, што вас пакусаў клешч», — рэкамендуе Пашковіч.
