Гаворка ішла аб эўрапейскай палітыцы ў адносінах да Беларусі. Ад 1 ліпеня Францыя будзе старшыняваць у Эўрасаюзе, і ад яе будзе залежаць замежная палітыка Саюзу. Мілінкевіч прапанаваў, каб эўрапейцы вялі дыялёг па некалькіх канкрэтных пунктах вядомых дванаццаці ўмоваў Эўрасаюзу.
Лідэр Руху «За свабоду» Аляксандар Мілінкевіч пра сваю сустрэчу з прэзыдэнтам Францыі Нікаля Сарказі.
— Ці задаволены вы размоваю зь Нікаля Сарказі і што дасьць гэтая сустрэча?
— Я вельмі задаволены сустрэчай. Яна была шчырай, адкрытай, вельмі канкрэтнай. Францускі прэзыдэнт даволі добра ведае сытуацыю ў Беларусі. Ад 1 ліпеня Францыя будзе старшыняваць у Эўрасаюзе, і безумоўна, ад краіны, якая зьяўляецца старшынём Эўрасаюзу на паўгоду, вельмі многа залежыць у замежнай палітыцы Саюзу. Францыя хацела б мець ініцыятывы адносна Беларусі, якія паспрыялі б дэмакратызацыі нашай краіны.Я прапанаваў дыялёг па некалькіх канкрэтных пунктах вядомых дванаццаці ўмоваў Эўрасаюзу.
Я гаварыў пра тое, што вельмі важна працягваць дыялёг, нягледзячы на выпадкі такой нечаканай рэпрэсіўнасьці ўлады, якія адбыліся ў сакавіку, бо альтэрнатывы дыялёгу няма, і калі пабудаваць «бэрлінскі мур» між намі і ЭС, гэта прывядзе да паслабленьня беларускай незалежнасьці. Я прапанаваў дыялёг па некалькіх канкрэтных пунктах вядомых дванаццаці ўмоваў Эўразьвязу. І перш за ўсё прапанаваў пачаць з вызваленьня палітвязьняў, свабоды СМІ і падрыхтоўкі да парлямэнцкіх выбараў, каб яны мелі значна больш дэмакратычную практыку, чым раней. Такія былі прапановы. Акрамя таго, мы гаварылі пра дапамогу вольным мэдыям у Беларусі, рэпрэсаваным, а таксама грамадзянскай супольнасьці.
* * *
Гэта ня першая сустрэча Аляксандра Мілінкевіча і Нікаля Сарказі. Былы кандыдат ад аб’яднаных дэмакратычных сіл Беларусі на прэзыдэнцкіх выбарах 2006 году А. Мілінкевіч сустракаўся ў Марсэлі зь Нікаля Сарказі восеньню 2006 году, калі той быў міністрам унутраных спраў Францыі.
Аляксандар Мілінкевіч падчас цяперашняга візыту ў Францыю сустракаўся зь міністрам замежных спраў Бэрнарам Кушнерам, францускімі палітыкамі, грамадзкімі дзеячамі, прадстаўнікамі СМІ.
8 траўня А. Мілінкевіч разам з кіраўніцай Камітэту дапамогі рэпрэсаваным Інай Кулей браў удзел ва ўрачыстасьцях у Парыжы, прымеркаваных да Дня Перамогі ў Другой сусьветнай вайне.
Паводле А. Мілінкевіча, галоўная мэта ягонага візыту — актывізаваць пазыцыю Францыі і канкрэтызаваць дзейнасьць Эўразьвязу ў Беларусі. Францыя з 1 ліпеня пяройме функцыі старшынства ў Эўразьвязе.
Раней Нікаля Сарказі заяўляў, што «Эўропа павінна зьмяніць сваё стаўленьне да праблемы Беларусі, недастаткова проста маральных жэстаў, неабходна палітычная абарона Беларусі». Паводле спадара Сарказі, «у Беларусі няма свабоды і дэмакратыі, улада ўжывае рэпрэсіі супраць уласнага народу».
