Надзвычайнае здарэнне на «Гродна-Азот» прыцягнула ўвагу да прадпрыемства. Чым яно адметнае?
«Гродна-Азот» выпускае вадкі тэхнічны аміяк, азотныя ўгнаенні і біядызельнае паліва. Каля 50% прадукцыі ідзе на экспарт.
Фармальна гэта адкрытае акцыянернае таварыства, але амаль 100% акцый належаць дзяржаве. Яшчэ каля 1000 чалавек маюць дробныя пакеты акцый. Летась уласнік кожнай карыснай паперы атрымаў усяго па 11 тысяч рублёў у якасці дывідэндаў.
Апошнія гады прадпрыемства аказалася ў заняпадзе — дастаткова паглядзець на зніжэнне чыстага прыбытку. За пяцігодку лічбы пагоршалі ў 300 разоў.
Чысты прыбытак
2015 год — $586 тысяч
2014 год — $11,2 мільёна
2013 год — $3,1 мільёна
2012 год — $62,5 мільёна
2011 год — $172,3 мільёна
Эканамічныя рэаліі вымагаюць скарачэння колькасці работнікаў. Яшчэ пяць гадоў таму іх было амаль 11 тысяч чалавек! Цяпер засталося 7750 работнікаў.
Генеральным дырэктарам «Гродна-Азота» працуе 55-гадовы выхадзец з Бранскай вобласці Расіі Канстанцін Маянаў. Ён адвучыўся ў Гомельскім дзяржаўным універсітэце і ў 1983 годзе быў накіраваны на гродзенскае «Хімвалакно». З цягам часу прадпрыемства ўвайшло ў склад «Гродна-Азота».