У зале суда плакалі ўсе: сенатарку Ганну Шарэйка вызвалілі проста пад апладысменты
10 чэрвеня Вярхоўны суд агучыў прысуд віцебскай сенатарцы, якая ўзначальвала Віцебскую птушкафабрыку (гандлёвая марка «Ганна»).
Перад пачаткам пасяджэння Шарэйка і Вальдэмарас Норкус (яе жаніх і бізнэс-партнёр, праз закупку кармоў у яго сенатарка і трапіла за краты) былі ў добрым гуморы: пасміхаліся, віталі знаёмых і сваякоў.
У выніку, Ганна Шарэйка атрымала 2 гады 6 месяцаў калоніі агульнага рэжыму і штраф у 31 мільён. Грамадзянін Літвы Вальдэмарас Норкус — 2 гады калоніі агульнага рэжыму і штраф у 31 мільён, вырашыў суддзя Уладзімір Давыдаў. Норкус застанецца ў турме. Ён не трапіў пад амністыю, 10 ліпеня, калі скончацца 2 гады, якія ён правёў за кратамі, Норкус выйдзе на волю.
Таксама і Шарэйка і Норкус пазбаўлены права займаць права кіраўнічыя пасады.
Разам з Шарэйка судзілі і іншых яе бізнэс-партнёраў і падначаленых. Гэта Надзея Семчанкава — былая намесніца гендырэктара фабрыкі, яна атрымала 2 гады пазбаўлення волі і 21 мільён штрафа. Яўген Канавальчанка — былы намеснік гендырэктара - 4 гады абмежавання волі без штрафа і накіравання ў папраўчую ўстанову. Мікалай Камароў, былы намеснік гендырэктара па фінансах, атрымаў 3 гады абмежавання волі. Міхаіл Разжывін, гендырэктар расйскай фірмы «Руском-Р» - 4 гады абіежавання волі. Уладзімір Ліярэнцэвіч — галоўны спецыяліст па замежнаэканамічных сувязях фабрыкі, адзіны, хто прызнаў віну, прысуджаны да 2 гадоў абмежавання волі.
Але ж абвінавачаныя правялі 2 гады ў СІЗА. Плюс трапілі пад амністыю прысвечаную 70-годдзю Перамогі. Усіх іх, апроч Норкуса, вызвалілі ў зале суда.
У пакоі загучалі апладысменты. Плакалі ўсе - не толькі сенатарка, але і яе падначаленыя, якія прыехалі падтрымаць былога кіраўніка.
Нагадаем, што шасцёра абвінавачаных прасілі іх апраўдаць. Сёмы, Ліярэнцэвіч, які прызнаў сваю віну, папрасіў вынесці «аб'ектыўны прысуд».
Пракурор Анатоль Мяцельскі прасіў па 2,5 гады Шарэйка і яе жаніху і бізнэс-партнёру Вальдэмарасу Норкусу. Для намеснікаў Шарэйка Семчанкавай і Канавальчанкі, а таксама Разжывіна пракурор запрасіў па 2 гады пазбаўлення волі са штрафам 100 базавых. Усіх — з пазбаўленнем права займаць пэўныя пасады на працягу 5 гадоў і з адбываннем у папраўчай калоніі ва ўмовах агульнага рэжыму.
Ліярэнцэвічу і Камарову — 2 гады абмежавання волі без накіравання ў папраўчыя ўстановы.
***
Нагадаем, што Ганна Шарэйка была арыштаваная ў жніўні 2014 года. Па версіі следства, Шарэйка, быўшы гендырэктарам Віцебскай бройлернай птушкафабрыкі, уступіла ў карупцыйную змову са сваім жаніхом Вальдэмарасам Норкусам, дырэктарам літоўскай фірмы «Даймас» і заснавальнікам кампаніі «Руском-Р» (ён абвінавачаны ў дапамаганні), праз якую ішлі пастаўкі ў Віцебск камбікармоў і кармавых дабавак.
Па словах пракурора, фірма Норкуса для заяўкі на конкурсе выстаўляла заведама заніжаную цану, але потым кошт павялічваўся за кошт транспартных выдаткаў і мытных плацяжоў. У выніку канчатковая цана замежнага камбікорму была значна вышэй айчыннага. Дзяржабвінавачанне ацэньвала шкоду у 4 млрд рублёў.
Пад час знаходжання ў СІЗА Ганна Шарэйка і Вальдэмарас Норкус вырашылі афіцыйна аформіць свае адносіны і зарэгістраваць шлюб, але суд адмовіў ім.
Шарэйка ўзначальвала віцебскую птушкафабрыку з 1998 года да свайго затрымання ў жніўні 2014 года. Таксама яна з’яўляецца членам Савета Рэспублікі ад Віцебскай вобласці. Пасля затрымання на сесіі Савета Рэспублікі Нацыянальнага сходу Беларусі яе пазбавілі недатыкальнасці.
На працягу 2006-2014 гадоў чысты прыбытак Віцебскай бройлернай птушкафабрыкі склаў $90 мільёнаў. У першы ж год пасля арышту дырэктаркі былі зафіксаваныя страты.
«Хай мяне асудзяць за мае словы, але я скажу» — першае інтэрв’ю Ганны Шарэйка
«Людзі моцныя становяцца толькі мацнейшымі ў такіх умовах» — Ганна Шарэйка пракаментавала вынікі судовага працэсу
Прадпрыемства Ганны Шарэйкі зарабіла $90 мільёнаў, а цяпер упершыню стала стратным — лічбы
Цяпер чытаюць
Цэнтральную ролю ў арганізацыі перамоваў з амерыканцамі адыграў муж Наталлі Пяткевіч. Чаму ён?3
Каментары