Сухапутныя войскі Амерыкі цалкам узброяцца 84-мм шведскім гранатамётам Carl Gustaf M3 — зброя будзе ў кожным пяхотным звязе, піша партал janes.com.
У амерыканскай арміі сістэма атрымала дадатковы акронім MAAWS (Multirole Anti-Armor Anti-Personnel Weapon System — Універсальная супрацьтанкавая і супрацьпяхотная сістэма ўзбраення), бо мае цэлы набор рознамэтавых боепрыпасаў — ад фугаснага і фугасна-аскепкавага да супрацьтанкавага, дымавога і асвятляльнага.
Цалкам падрыхтоўка да пераўзбраення будзе завершаная да канца 2016 года, аднак ўжо цяпер шведскія гранатамёты былі атрыманыя асобнымі часткамі арміі і Нацыянальнай Гвардыі ЗША.
Перад гэтым Carl Gustaf M3 ужо доўгі час выкарыстоўваліся сіламі спецыяльнага прызначэння ЗША, у тым ліку ў апошнія гады - у Афганістане. Відавочна, досвед выкарыстання ў складаных горных умовах цалкам задаволіў амерыканцаў.
Гранатамёт важыць менш за 10 кг і мае 3-кратны аптычны прыцэл. Цяпер ідуць выпрабаванні аблегчанай мадыфікацыі М4, якая мае вагу да 6,7 кг.
У Беларусі асноўным тыпам шматразовага пяхотнага гранатамёта застаецца РПГ-7 яшчэ савецкай распрацоўкі, які з'яўляецца адносна лёгкай і надзейнай зброяй, аднак наўрад ці адпавядае сучасным патрабаванням па трапнасці стральбы і ўніверсальнасці выкарыстання.
Супрацьтанкавыя магчымасці гранат РПГ-7 таксама ўжо не адпавядаюць узроўню абароны сучасных узораў цяжкай бранятэхнікі.
Каментары