Сёння ў інстаграме Дзмітрыя Урангеля з'явілася фота, дзе той пазіруе ў саколцы з Пагоняй.
Дзмітрый Урангель — вядучы на тэлеканале АНТ, у эфір выходзіць яго праграма пра падарожжы «Прыгоды капітана Врангеля».
Дзмітрый Врангель злева
«Наша Ніва» датэлефанавалася да яго, каб спытаць, ці не баіцца ён праблем з кіраўніцтвам, калі тое знойдзе ў фота «крамолу».
«Гэта раней было некамільфо, хадзіць з «Пагоняй», — адказаў Урангель, — цяпер усё наадварот. Мне раней даводзілася хаваць, што мне падабаецца «Пагоня», а цяпер я бачу — усё ў парадку. Усе вельмі хутка пераабуваюцца, я бачу, і кіраўніцтва пераабулася вельмі хутка».
Потым Дзмітрый прыгадаў пра свята вышыванкі ад БРСМ і пажартаваў, што можа і яны хутка пойдуць пад бел-чырвона-белым сцягам.
А што да праблем на рабоце, то ён не думае, што фота ў саколцы з «Пагоняй» — прычына для хвалявання.
«Я адзеў тое, што мне падабаецца, што тут такога, — падсумаваў ён. — На маёй працоўнай кніжцы такi жа сімвал. Я часам у горад выходжу ў гэтай саколцы, ніколі з АМАПам ці міліцыя не было праблем. Ніхто мяне не штурхае, усё добра!»
