Былая супрацоўніца службы дзелавога пратаколу Кіраўніцтва справаў прэзідэнта абвінаваціла сэкс-трэнера Алекса Леслі ў дамаганнях і маральнай траўме пасля праходжання трэнінгаў.
Як паведамляе Life.ru, 27-гадовая мадэль Васіліна Вялічка доўгі час лічылася сярод супрацоўніц службы дзелавога пратаколу Палаца Рэспублікі.
Васіліна Вялічка.
Яна стала ўдзельніцай трэнінгу асобаснага і сэксуальнага росту, які праводзіў Алекс Леслі (дарэчы, таксама ўраджэнец Беларусі). А пасля нібыта напісала заяву ў міліцыю на Леслі, абвінаваціўшы яго ў рэгулярных дамаганнях, а таксама ў жорсткім абыходжанні і прыніжэнні.
Дзяўчына запэўнівае, што збегла з трэнінгаў, а калі пазней выпадкова сустрэлася з Леслі ў кавярні, ён сэксуальна дамагаўся яе, распускаў рукі і нават прапаноўваў сэкс яе маці па тэлефоне. Усё гэта, па словах дзяўчыны, Алекс здымаў на відэа і трансляваў у сваім мікраблогу, што жудасна абразіла яе і сапсавала рэпутацыю.
Сам Алекс сцвярджае, што ўсё гэта было толькі «гульнёй на разняволенне», што так часта адбываецца ў рамках трэнінгаў. А дзяўчына, па словах настаўніка, звярнулася ў міліцыю са злосці пасля таго, як ён не адказаў ёй узаемнасцю.
«Яна на трэнінгі прыйшла спецыяльна, каб пазнаёміцца са мной, і спадзявалася пабудаваць рамантычныя адносіны. Была закаханая ў мяне, — тлумачыць сэкс-трэнер. – Я адмовіў, і яна паабяцала адпомсціць. Тады і напісала ў Беларусі заяву ў паліцыю, а паколькі працавала ва ўладзе, звярнулася па дапамогу да чыноўнікаў, каб дамагліся завядзення на мяне крымінальнай справы. Апошнія паўгода на мяне і маіх вучняў у Беларусі — сапраўдныя ганенні. Выклікаюць на допыты, прымушаюць высунуць супраць мяне абвінавачванні, абы-якія, абы заяву напісалі. Усё схіляюць да таго, што ў мяне прытон, і я плачу грошы за сэкс з вучаніцамі. Увогуле, справу шыюць», - распавёў Алекс Леслі.
У Міністэрстве ўнутраных спраў не змаглі пракаментаваць сітуацыю, патлумачыўшы, што ў інтэрв'ю Леслі ідзе размова пра паліцыю, а ў Беларусі – міліцыя.
