Расійскі прэзідэнт Уладзімір Пуцін перад сустрэчай з прэзідэнтам Турцыі Рэджэпам Таіпам Эрдаганам у Санкт-Пецярбургу заявіў, што ён быў адным з першых, хто патэлефанаваў Эрдагану і выказаў словы падтрымкі падчас няўдалай спробы ваеннага перавароту.
Reuters
Эрдаган, у сваю чаргу, прызнаўся, што ўзрадаваўся званку Пуціна. «Сапраўды, ваш званок адразу пасля спробы перавароту і мяне асабіста, і маіх калегаў, і наш народ вельмі парадаваў, — заявіў ён.
Сустрэча двух лідараў праходзіць у грэчаскай гасцінай Канстанцінаўскага палаца ў Стрэльне і пачалася з поціску рук.
«Ваш цяперашні візіт, нягледзячы на вельмі складаную ўнутрыпалітычную сітуацыю ў Турцыі, кажа пра тое, што мы ўсе хочам аднаўлення нашага дыялогу, аднаўлення адносін у імя інтарэсаў народаў Турцыі і Расіі», — звярнуўся Пуцін да Эрдагана.
Эрдаган падзякаваў Пуціну за магчымасць сустрэцца і выказаў меркаванне, што адносіны дзвюх краін увайшлі ў станоўчае рэчышча.
Цяперашняя сустрэча — першая пасля таго як у лістападзе 2015 года Турцыя збіла расійскі ваенны самалёт Су-24. Расія таксама стала першай краінай, якую Эрдаган наведаў пасля спробы перавароту ў Турцыі.
Напярэдадні сустрэчы ў Пецярбургу Эрдаган даў інтэрв'ю расійскаму агенцтву ТАСС, у якім называў Пуціна сваім сябрам.
«Гэта будзе гістарычны візіт, новы пачатак. На перамовах з маім сябрам Уладзімірам, я веру, будзе адкрытая новая старонка ў двухбаковых адносінах. Нашым краінам трэба будзе шмат зрабіць разам», — сказаў прэзідэнт Турцыі.
