Такое рашэнне прыняў 5 чэрвеня выканкам Федэрацыі хакея Беларусі.
Па выніках чатырохкругавога турніру з удзелам дзесяці беларускіх і чатырох латвійскіх клубаў будуць вызначаны ўладальнікі залатых, сярэбраных і бронзавых узнагарод. Потым адбудзецца раздзельны плэй‑оф: у Беларусі за званне пераможцы будуць змагацца восем лепшых айчынных каманд, у Латвіі — чатыры ўдзельнікі беларускага чэмпіянату і чатыры лепшыя клубы нацыянальнага чэмпіянату, у якім будуць гуляць таксама каманды з Эстоніі і Літвы.
«У нас розныя школы, розны ўзровень падрыхтоўкі. Саперніцтва будзе добрым. Гэта будзе цікава і хакеістам, і гледачам», — заявіў прэзідэнт федэрацыі хакея Латвіі Кіраў Ліпман. Паводле яго слоў, неабходна захаваць прывабнасць чэмпіянатаў дзвюх краін, улічваючы, што дынамаўскія каманды з Рыгі і Мінска будуць гуляць у Кантынентальнай хакейнай лізе.
Бакі дамовіліся падпісаць кантракт, у якім будуць урэгуляваны ўсе арганізацыйныя пытанні, уключаючы выдачу віз і пражыванне ў гасцініцах.
Латышы планавалі, што супрацоўніцтва будзе доўгатэрміновым, аднак беларусы згадзіліся прыняць каманды суседняй дзяржавы пакуль толькі на адзін сезон. Як патлумачыў старшыня ФХРБ Уладзімір Навумаў, у 2009 годзе ў Беларусі з\’явяцца дзве новыя хакейныя каманды, у 2010 годзе — яшчэ тры. Гэта непазбежна прывядзе да змянення фармату чэмпіянату (пачнецца абмен горшымі і лепшымі паміж экстралігай і вышэйшай лігай), і пытанне далейшага ўдзелу латвійскіх клубаў будзе патрабаваць дэталёвай прапрацоўкі.
Клубы з Латвіі ўдзельнічалі ў беларускім чэмпіянаце да 2006 года, але потым з фінансавых прычын засяродзіліся на ўнутраным першынстве.
Як заявіў журналістам К.Ліпман, расходы клубаў на паездкі ў Беларусь складуць 100—120 тыс. долараў ЗША, і дадаў: «Мы павінны думаць аб прэстыжы нашага чэмпіянату».
