У Нарвегіі 126 уладальнікаў аўтамабіля Model S падалі ў суд на кампанію Tesla — пазоўнікі незадаволеныя хуткасцю разгону электракара.

Getty

Як паведамляе агенцтва Блумберг, нарвежцы хочуць, каб амерыканскі вытворца электрамабіляў вярнуў ім грошы, бо аўтамабілі, на іх думку, не адпавядаюць заяўленым патрабаванням па магутнасці і хуткасці.

Адвакат юрыдычнай фірмы Wikborg Rein Каспар Томэсэн паведаміў Блумбергу, што ў машын занадта мала конскіх сіл.

У электрамабілі Model S P85D прадугледжаны «шалёны рэжым», пры якім аўтамабіль павінен разганяцца да 100 км у гадзіну ўсяго 3,1-3,3 секунды. Нарвежскія пакупнікі сцвярджаюць, што ў «шалёным рэжыме» аўтамабіль не разганяецца так хутка.

Прадстаўнікі Tesla паведамілі Блумбергу і нарвежскім СМІ, што тэсты, праведзеныя самой кампаніяй і незалежнымі экспертамі, паказалі, што рэальныя характарыстыкі аўтамабіля адпавядаюць заяўленым.

Адзін з расчараваных пакупнікоў фрода Флетэн Якабсэн паведаміў нарвежскаму выданню Dagens Naeringsliv, што ён прадаў старую версію Model S магутнасцю ў 400 конскіх сіл, каб купіць больш магутную 700-сільную Model S P85D.

Ён кажа, што даплаціў каля 18 тысяч даляраў, але, па словах Якабсэна, магутнасць новага аўтамабіля склала толькі 469 конскіх сіл.

Нарвегія стала адным з самых буйных рынкаў для аўтамабіляў Tesla, паведамляе Блумберг. Часткова гэта звязана з субсідыямі з боку ўрада на куплю электрамабіляў. Мадэль Model S P85D больш не прадаецца ў краіне, яе змяніла Model S P90D.

У Нарвегіі ўжо падавалі ў суд на Tesla з-за занадта павольнага разгону электракара P85D. У чэрвені суд пастанавіў выплаціць пяці пацярпелым кліентам каля 6 тысяч даляраў кожнаму. Тады СМІ паведамілі, што аўтамабіль разганяецца да 100 км у гадзіну за 3,5 секунды.