Былы старшыня Савета міністраў т.зв. «Луганскай народнай рэспублікі» Генадзь Цыпкалаў, затрыманы «за спробу дзяржаўнага перавароту», пакончыў з сабой. Пра гэта паведаміў прадстаўнік Генпракуратуры «ЛНР» Сяргей Рахно, піша Медуза са спасылкай на Інтэрфакс.
joinfo.ua
«Цыпкалаў, імаверна, усвядоміўшы глыбіню сваіх злачынных дзеянняў і ўсвядоміўшы, што прадстаўленая ім аператыўная інфармацыя пра кола асоб, якія ўдзельнічаюць у змове , з'яўляецца безумоўна небяспечнай для яго жыцця, і будуць прынятыя спробы яго фізічнай ліквідацыі змоўшчыкамі, якія, знаходзяцца на волі, здзейсніў самагубства шляхам павешання», — заявіў Рахно.
Паводле яго слоў, Цыпкалаў «утрымліваўся ў адным з адміністрацыйных будынкаў» «ЛНР», бо існавалі асцярогі, што яго паспрабуюць ліквідаваць іншыя ўдзельнікі «змовы».
На 24 верасня, дадаў ён, была запланаваная вочная стаўка Цыпкалава з адным з кіраўнікоў Народнай міліцыі «ЛНР» — Кісялёвым, які раней прызнаўся ў злачынстве.
Па версіі Генпракуратуры «ЛНР», удзельнікі змовы, па падазрэнні ў дачыненні да якой быў затрыманы Цыпкалаў, планавалі зрынуць, «у тым ліку з фізічнай ліквідацыяй», кіраўніцтва самаабвешчанай рэспублікі.
У пачатку жніўня 2016 года ў Луганску быў падарваны аўтамабіль кіраўніка «ЛНР» Ігара Платніцкага. Прадстаўнікі «ЛНР» абвінавацілі ў спробе замаху на Платніцкага «ўкраінскіх дыверсантаў».
Генадзь Цыпкалаў займаў пасаду прэм'ер-міністра «ЛНР» са жніўня 2014 года па снежань 2015 года. Пасля адстаўкі ён лічыўся дарадцам кіраўніка «ЛНР».
