Дзяржсакратар ЗША Джон Керы заявіў, што Вашынгтон можа спыніць узаемадзеянне з Масквой па Сірыі, калі сірыйскія войскі і расійская авіяцыя не спыняць наступ на горад Алепа.
Як паведаміў прадстаўнік дзярждэпартамента Джон Кірбі, гэтае папярэджанне было зробленае ў сераду падчас тэлефоннай размовы Керы з кіраўніком расійскага МЗС Сяргеем Лаўровым.
Па словах прадстаўніка дзяржаўнага дэпартамента, Керы выказаў расійскаму калегу глыбокую занепакоенасць у сувязі з тым, што ў выніку ваенных дзеянняў церпяць мірныя грамадзяне, падвяргаюцца абстрэлу бальніцы, вадаправоды і іншая гарадская інфраструктура.
Сірыйская армія пры падтрымцы расійскай авіяцыі разгарнула маштабнае наступленне на Алепа, які лічыцца апорай сірыйскай апазіцыі. У выніку масіраваных абстрэлаў і бамбаванняў каля двух мільёнаў жыхароў горада засталіся без водазабеспячэння.
