Тут і ніжэй фота: РАР
У Польшчы праходзіць агульнанацыянальны страйк жанчын у рамках так званага «Чорнага пратэсту» супраць магчымай поўнай забароны і крыміналізацыі абортаў.
Гаворка ідзе пра грамадзянскі законапраект, які трапіў на разгляд у Сейм і які цалкам забараняе перапыненне цяжарнасці. Сейм накіраваў законапраект на дапрацоўку сеймавым камісіям.
Пратэст у Варшаве
У рамках акцыі ў дзень пратэсту жанчыны апранаюцца ў чорнае, а таксама не ідуць на працу, карыстаючыся правам ўзяць дзень адпачынку па ўласным жаданні. Жанчын таксама падтрымалі мужчыны. Пратэсты праходзяць у Кракаве, Уроцлаве, Гданьску, Беластоку, Шчэціне, Познані і многіх іншых гарадах.
Пратэст у Познані
Паводле інфармацыі ўладаў Варшавы, у цэнтры горада, нягледзячы на дажджлівае надвор'е, сабраліся каля 30 тысяч чалавек.
Пратэст ва Уроцлаве
Паводле ацэнак арганізатараў, ва Уроцлаве на пратэст выйшлі 20 тысяч чалавек.
Акрамя таго, пратэсты прайшлі ў еўрапейскіх гарадах, напрыклад у Парыжы, Бруселі, Берліне, Дубліне.
У той жа час па ўсёй краіне таксама праходзяць імшы і малітвы за людзей, якія прымаюць рашэнне ў Польшчы адносна аховы чалавечага жыцця. Арганізатары малітваў заклікалі прыходзіць на імшу ў белай вопратцы.
Імша ў Лодзі
Пратэсты супраць забароны абортаў у Польшчы працягваюцца ўжо больш за тыдзень — з таго часу, як Сейм Польшчы прагаласаваў ў першым чытанні за законапраект аб поўнай забароне абортаў і ўвядзенні крымінальнай адказнасці за іх здзяйсненне.
У суботу ў Варшаве прайшоў маштабны «Чорны пратэст», калі тысячы жанчын сабраліся пад будынкам Сейма, каб выказаць сваю нязгоду з законапраектам.