Загінулая сёння ўвечары ў гандлёвым цэнтры «Еўропа» на вуліцы Сурганава ў Мінску — супрацоўніца адной з крамаў. Яна адлучылася з працоўнага месца, каб купіць калготкі. Такая інфармацыя прагучала ў праграме «Навіны» тэлеканала АНТ.
Па апошняй інфармацыі, мінчук 1998 года нараджэння, прыстойна апрануты, зайшоў у гандлёвы цэнтр з футаралам для гітары і бензапілой у 17.28. На яго ніхто не звярнуў увагі. Завёўшы бензаінструмент, ён накінуўся на дзяўчыну, прычыніўшы ёй цялесныя пашкоджанні, ад якіх яна памерла. Затым дастаў з футарала сякеру і пачаў пагражаць іншым. Траўмы атрымала яшчэ адна дзяўчына.
Сігнал у міліцыю паступіў у 17.34. На працягу двух хвілін на месцы былі супрацоўнікі Дэпартамента аховы МУС і патрульна-паставой службы міліцыі. Нападніка яны затрымалі з дапамогай ахоўнікаў гандлёвага цэнтра.
Матывы злачынства пакуль не вядомыя.