 |
Паводле кубінскага тэлебачаньня, сустрэча працягвалася паўтары гадзіны. Браты Кастра паразмаўлялі з Уга Чавэсам на вольным паветры незадоўга да яго адлёту на радзіму, паведамляе newsru.com. За гутаркай была абмеркаваная праблема наступстваў харчовага крызысу ў сьвеце.
Фідэль Кастра выглядаў схуднелым, аднак заўважна падужэлым пасьля складанай апэрацыі, перанесенай у ліпені 2006 г.
На разьвітаньне Фідэль размаўляў з Чавэсам стоячы. Як і на папярэдніх відэароліках, Кастра быў апрануты ў спартовы касьцюм. Апошні раз Фідэль Кастра зьяўляўся на экранах тэлевізараў 16 студзеня гэтага году.
Нагадаем, што з пасады прэзыдэнта краіны Фідэль Кастра сышоў у лютым 2008 г. пасьля 49 гадоў кіраваньня. Пасьля апэрацыі на кішэчніку, перанесенай у ліпені 2006 году, ён перадаў большую частку сваіх паўнамоцтваў свайму меншаму брату Раулю, які пазьней і заняў пасаду прэзыдэнта.
