Дубы маюць асаблівае значэнне ў гісторыі Астраўца, кажа гісторык.

Хоць 84-гадоваму Адаму Мальдзісу ўжо нялёгка хадзіць, ураджэнец Астравеччыны прыйшоў у Рэдакцыю «Нашай Нівы», каб перадаць сваё меркаванне землякам. Прафесара так зачапіла спілоўванне дубоў у Астраўцы дзеля будаўніцтва новага квартала.

Адам Мальдзіс не можа стрымацца.

«Як астраўчане могуць пасягаць на тое, што ў іх гербе!? — абурыўся Адам Іосіфавіч. — Дуб — гэта ж спрадвечны сімвал Астраўца!».

Ён нават адмыслова прынёс магніцік з уласнага халадзільніка з астравецкім гербам.

«Там жа, у Астраўцы, быў маёнтак віленскага ваяводы Альбрэхта Гаштаўта — аднаго з арганізатараў і «распрацоўшчыкаў» выдання Статуту ВКЛ. Неаднаразова туды ездзілі віленскія арыстакраты, і нават кароль, і — я ўпэўнены — і наш першадрукар Скарына, бо З 1526 года па 1530 ён служыў у віленскага біскупа Яна. А біскуп быў сын польскага караля, — распавёў Мальдзіс. - І дарога ад Вільні да Астраўца мела назву «каралеўскай», а ў гістарычных дакументах яе называюць «вялікай» — бо на ёй быў вялікі рух. Яна была абсаджаная менавіта дубамі — дуб быў сімвалам каралеўскай улады. Дубы былі і ля маёнтка, і ля касцёла. У астатніх мястэчках, ля іншых маёнткаў дубоў няма. І нават калі сённяшнія тыя дрэвы ўжо высаджваліся пазней, то ўсё роўна — гэта частка нашай гісторыі, якую нельга знішчаць».

Мальдзіс паведаміў, што ён гатовы пратэставаць супраць высякання дубоў. Прычым, даволі нечаканым чынам.

«Мне прысвоілі званне ганаровага грамадзяніна Астраўца — тады яшчэ не горада, а гарадскога пасёлка. Калі гэтую вырубку не адменяць, то я адмоўлюся ад звання», — з горыччу сказаў Адам Іосіфавіч.

Чытайце таксама: SOS! У Астраўцы высякаюць векавыя дубы

«Месца ім мала! Высякаюць такія дрэвы, якія былі б аздобай любога горада, любога квартала! Ды ў любой краіне людзі гатовыя дорага заплаціць, каб мець такі прыгожы дуб на сваёй вуліцы, а ў нас трацяць бензін і псуюць пілы на зразанне», — эмацыйна напісаў нам чытач з Астраўца, які папрасіў падпісаць яго Мар'янам (адрас у Рэдакцыі ёсць).

Высветлілася, што займаецца работамі даччынае прадпрыемства мясцовага ЖКГ пад назвай «Вытворча-рамонтны ўчастак».

Гэта абумоўлена планам забудовы, які ўжо прайшоў усе экспертызы і зацверджаны. На гэтым месцы будуць пракладаць газаправод, кажа дырэктар прадпрыемства Казімір Багдановіч.

Тым часам «Наша Ніва» атрымала ўжо іншы ліст ад чытачоў Вячаслава П. і Дзіяны Д., якія скардзяцца, што «пад нож» дзеля будаўніцтва новага мікрараёна (паміж вёскамі Каменка, Слабодка і самім Астраўцом) пойдзе цэлы ландшафтны луг — больш за 40 дрэваў. Вось гэты:

«Наша Ніва» будзе далей сачыць за сітуацыяй, але звароты ў мясцовыя кантралюючыя органы павінны пісаць і самі жыхары, каб зберагчы мясцовую прыгажосць.

Адрас Астравецкага райвыканкама: 231201, г. Астравец, вул. К.Маркса, 2. Тэлефон: (01591) 2-12-24. Займаецца такімі пытаннямі аддзел ЖКГ і галоўны архітэктар раёна.

Клас
Панылы сорам
Ха-ха
Ого
Сумна
Абуральна

Хочаш падзяліцца важнай інфармацыяй ананімна і канфідэнцыйна?

Каб пакінуць каментар, калі ласка, актывуйце JavaScript у наладах свайго браўзеру