Камандай вядомых творцаў падрыхтавана да друку ўнікальнае выданне пра выбітных майстроў Віцебскай школы, яркіх прадстаўнікоў не толькі беларускага, але і сусветнага мастацтва. Збор сродкаў на інтэрактыўную кнігу пачаўся на краўдфандынгавай пляцоўцы Ulej.by.

Самы цымус пра выданне

Аўтары сцвярджаюць, што стварылі кнiгу «Беларускае мастацтва ХХ стагоддзя. Віцебская школа», каб дзеці і дарослыя пачалі знаёміцца з беларускім мастацтвам мінулага стагоддзя праз казачныя гісторыі, вершы і творчую гульню. Гэтая кніга дапаможа зразумець складаныя моманты ў творах сучаснага мастацтва і пазнаёміць вас з нязнанымі мастакамі.

У кнігу ўвайшлi творы Казіміра Малевіча, Марка Шагала, Алесi Паслядовiч, Уладзіміра Цэслера, Генадзя Хацкевіча, Людмілы Русавай і Руслана Вашкевіча. На творчасць кожнагаз іх наклала свой адбітак сусветнавядомая «Віцебская школа».

На сённяшні дзень зроблена ўся неабходная праца для выхаду кнігі ў свет. Засталося толькi яе надрукаваць. Стваральнікі праекта прапануюць унікальную магчымасць — ажыццявіць перадзамову гэтай кнігі, каб вашыя дзеці (браты або сёстры, пляменнікі цi дзеці сяброў) сталі не проста першымі ўладальнікамі такой важнай і якаснай кнігі, але і ў будучыні сталі носьбітамі беларускiх культурнiцкiх каштоўнасцяў, вывучэнне якіх так лёгка пачнецца з дапамогай гэтага выдання. Пазнаёміцца з раздзелам, напрыклад, пра Казіміра Малевіча можна тут.

З чаго ўсё пачалося

8 месяцаў таму працаваць над праектам мары. Кожны з нас — гаворка ідзе пра удзельнікаў праекта «Дзіцячыя творчыя майстэрні» — вандруючы, почасту разглядае кніжныя паліцы кнігарняў пры еўрапейскіх музеях класічнага і сучаснага мастацтва i з прагнасцю пастсавецкага чалавека разглядаем дзіцячыя кнігі, дзе так цікава і так зразумела распавядаецца дзіцяці пра мастацтва. І вядома, у галаве ўзнiкае думка: «Чаму ў нас такога да гэтуль няма?» У рэшце рэшт мы не вытрымалі і пачалі працу над кнігай

«Беларускае мастацтва ХХ стагоддзя. Віцебская школа». І як толькі пачалася праца над ёй, у працэс ўключыліся такія людзі, што нам самім стала страшна ад шчасця: Адам Глобус, Лявон Вольскі, Валянцін Акудовіч, Андрэй Хадановіч, Ганна Кісліцына і інш. І мы зразумелі, што рухаемся ў правільным кірунку, такая кніга абавязаная з'явіцца ў Беларусі.

Частка каманды, якая працавала над кнiгай

Беларускае мастацтва XX стагоддзя ў свеце вядома ў першую чаргу дзякуючы Віцебскай школе. За кароткі тэрмін ў Віцебску адбылося шмат падзей: у 1919 годзе Марк Шагал адкрыў першую ў Беларусі мастацкую вучэльню. У тым жа годзе туды прыехалі выкладаць Эль Лісіцкі і Казімір Малевіч і неўзабаве стварылі творчую групу «Уновіс». Гэта быў час рэвалюцыйнага і рамантычнага авангарду, час паўставання ўплывовых ідэй, якія да нашага часу маюць уздзеянне на мастакоў усяго свету.

Нам хочацца не толькі пазнаёміць чытачоў з «Віцебскай школай», але і паказаць эвалюцыю яе ідэй. Сучасныя беларускія мастакі ў сваіх творчых пошуках часта звяртаюцца да набыткаў віцебскіх авангардыстаў.

Таму ў кнізе вы знойдзеце постаці мастакоў з найноўшай гісторыі беларускай культуры.

Для каго гэтая кніга

  • Для першаклашак. Можна лічыць гэтую кнігу прасунутым падручнікам з сучасным падыходам да засваення інфармацыі дзіцяці ў гульнявой і займальнай форме.

  • Для дашкалят. Яны будуцць вывучаць мастацтва праз займальныя казкі.

  • Для дарослых. Ніколі не позна пазнаваць нешта новае, асабліва разам са сваім дзіцем.

Чаму стваральнікі кажуць, што гэта настольная кніга 2017 года для вашага дзіцяці?

Чытаць яе можна раздзел за раздзелам, а можна адгарнуць на старонцы пра вашага любімага мастака ці наадварот — пачаць з таго творцы, пра каго вы зусім анічога не ведаеце!

У кнізе вы знойдзеце казкі, вершы, факты з жыцця мастакоў, а таксама гульні.

Казкі і вершы паводле карцін прыдумалі і запісалі вядомыя беларускія паэты і пісьменнікі. Факты з жыцця выбітных творцаў пазнаёмяць вас з тым, калі, як і дзе жылі мастакі, а таксама пра іх творчы даробак. Гульні дапамогуць дзецям зразумець некаторыя таямніцы мастацтва. У гэтай кнізе можна маляваць, з ёй можна гуляць, а яшчэ — варта чытаць, разглядаць і разважаць над ёй, каб зрэшты навучыцца разумець сучаснае беларускае мастацтва і ягоную «Віцебскую школу».