ДАІ Мінска разглядае пытанне аб платным уездзе ў цэнтральныя раёны сталіцы. Пра гэта сёння паведаміў начальнік аддзела тэхнічных сродкаў і сістэм ДАІ ГУУС Мінгарвыканкама Дзмітрый Навой на прэс-канферэнцыі, прысвечанай канцэпцыі бяспекі дарожнага руху «Добрая дарога» на 2016—2020 гады.
«Адным з кірункаў канцэпцыі будзе абмежаванне руху асабістага транспарту ў цэнтральнай частцы Мінска шляхам увядзення сістэмы платных парковак, забеспячэння прыярытэту грамадскага транспарту. Таксама разглядаюцца пытанні аб увядзенні платнага ўезду ў пэўныя зоны цэнтральнай часткі горада», — растлумачыў Дзмітрый Навой.
Паводле яго слоў, колькасць машын у Мінску набліжаецца да крытычнай. «Цяпер у мінчан узровень аўтамабілізацыі — каля 400 машын на 1000 жыхароў, хоць горад разлічаны на 380. Калі ўзровень дасягне 420 машын, Мінск проста спыніцца», — сказаў на заканчэнне Дзмітрый Навой.
