Зараз, калі робіцца холадна і надвор'е ўсё радзей радуе нас, мы часцей застаемся ва ўтульных хатах. Вось топ-5 кніг, якія варта не прапусціць гэтай зімой.
«Завяршыць гештальт» Макса Шчура
Дзённік падарожжа «чалавека з фотаапаратам» у прасторы і часе, з Чэхіі ва ўлюбёную краіну ягонай маладосці Галандыю. Па дарозе герой-апавядальнік сустракае людзей з розных краін Еўропы і свету, абмяркоўвае з імі надзённыя пытанні эстэтыкі, эротыкі і геапалітыкі і напружана чакае, калі з ім нарэшце здарыцца нешта, што апраўдае ягонае рашэнне выехаць за мяжу — як цяпер, так і дваццаць гадоў таму з Беларусі. Ён перакананы, што галоўная сустрэча ягонага жыцця чакае яго ў Амстэрдаме. Вось як адзываюцца пра гэту кнігу чытачы: «Калі паспрабаваць акрэсліць сюжэт, то гэты твор пра мужчыну, які вырашае выправіцца ў вандроўку з Чэхіі ў Нідэрланды, пры гэтым пастаянна разважае пра сваё мінулае, сучаснасць, пра неакрэсленую будучыню. Ён збег з Беларусі ў Чэхію, якую так і не змог цалкам адчуць сваім домам, а цяпер спрабуе завяршыць гештальт вандроўкай па Еўропе з канцавым прыпынкам «Нідэрланды». Шчур расказвае пра тое, што яму бліжэй за ўсё — пра сябе, таму гісторыя атрымліваецца шчырай і не перабольшанай.»
Андрэй Лазар «Таварыства кнігалюбаў»
Кніга пачынаецца так: у сеціве з'яўляецца навіна пра тое, што вядомы мільярдэр схаваў у адной з бібліятэчных кніг чэк на мільярд у.а., а таксама грошы меншымі купюрамі на тую ж суму ў розных кнігах. А падзеі адбываюцца ў Беларусі ў недалёкай будучыні, дзе папяровыя кнігі ўжо амаль выйшлі з ужытку. «Таварыства кнігалюбаў» — гэта не проста незвычайная гісторыя, а раман-рэбус, у якім сплялося вельмі шмат: дэтэктыўны сюжэт, таямнічыя героі, глыбіня падтэкстаў…Чытач, нібы даследчык, крок за крокам ідзе пакручастай сюжэтнай сцяжынкай, сустракаючы на ёй шмат цікавага. Літаратура пра літаратуру — гэта неверагодна захапляльна. Не верыце? Разгарніце незвычайную кнігу Андрэя Лазара і пераканайцеся самі.
Кацярына Мядзведзева «Разламашкі майстра Люфта»
Складаецца кніга з такой незвычайнай назвай з некалькіх аповесцяў і апавяданняў. Адкрывае кнігу аповесць «Чараўнік для Дэйсі Мэй», па назве якой можна падумаць, што гэта пераклад на беларускую мову твору нейкага брытанскага аўтара. Кніга напісанаў у такім стылі, што ў некаторыя моманты пачынае здавацца, што чытаеш Шарлоту Бронтэ. Гэтая аповесць вучыць нас любіць сябе заўжды і ў любой сітуацыі, быць упэўненымі ў сабе. І хоць гісторыі гэтыя казачныя, але гэта хутчэй казкі для дарослых. А кніга ўся такая жаноцкая-жаноцкая..
Барыс Пятровіч «Спачатку была цемра»
Падзеі аповесці адбываюцца ў Беларусі ў канцы ХХ ст., у вельмі важны і пераломны для краіны час. Наш герой прачынаецца пасля комы, у якой прабыў 3 гады, у доме для інвалідаў у палескай глушы. Яго суседзі — псіхі ды інваліды, людзі без дамоў, родных і сваякоў. У яго амнезія, не можа згадаць нават сваё імя, а ўсе вакол завуць яго Славік, бо менавіта гэтае імя ён шаптаў у трызненні. І разам з нашым героем мы мусім прайсці складаны шлях вяртання да сябе, так бы мовіць, «успомніць усё». Самае цікавае, што трапіў у кому «Славік» у СССР, а прыйшоў у сябе ўжо ў незалежнай Беларусі. Змены мала закранулі гэты дом інвалідаў. Хіба што набліжаюцца першыя прэзідэнцкія выбары, якія ўсе абмяркоўваюць.
Уладзімір Садоўскі «1813» Навела, апавяданні
Дзеянне навэлы «1813» адбываецца ў 1813 годзе ў апошнія дні зімы. У разбуранае Вялікай вайной мястэчка на ўскрайку Мінскай губерні наведваецца госць са сталіцы. Міхал Клеафас Агінскі — дыпламат, кампазітар, а зараз сенатар Расійскай Імперыі — прыязджае пагасціць да свайго дзядзькі ў фамільны замак ля Маладэчна. З надыходам адлігі ў наваколлях мястэчка пачынаюць адбывацца незразумелыя рэчы: забітыя жаўнеры паўстаюць з поля мінулай бітвы і нападаюць на жыхароў паселішча. Хутка замак Агінскіх апынаецца ў аблозе хадзячых мерцвякоў. Міхалу Клеафасу не застаецца нічога іншага, як зноў узяць у рукі зброю і змагацца за свабоду роднага края. Толькі гэтым разам ворагам будуць не жывыя людзі, а паўсталыя пачвары. У кнізе таксама змешчаны ў якасці бонуса пяць новых апавяданняў Уладзіміра Садоўскага.
