Тэму стварэння спецыяльных вагонаў для жанчын цяпер актыўна абмяркоўваюць у Шанхаі. З падобнай ініцыятывай выступіў дэпутат мясцовага Сходу народных прадстаўнікоў Шэнь Цюньхуэй, аргументуючы гэта тым, што ў гадзіны пік шмат кабет адчуваюць дыскамфорт, і не заўсёды мужчыны паводзяць як джэнтльмены. Сваю ініцыятыву Шэнь прапанаваў абмеркаваць публічна і зладзіць эксперымент на некалькіх лініях метро.
Некалькі гадоў таму за падобную меру выступалі і ў Расіі, каб зрабіць метрапалітэн у вялікіх гарадах больш камфортным для цяжарных жанчын, маленькіх дзяцей і пажылых людзей. За гэтымі катэгорыямі грамадзян прапанавалі замацаваць, напрыклад, першы вагон. Але ў Дзярждуме законапраект выклікаў шмат пытанняў кшталту: «Хто будзе кантраляваць паток пасажыраў, ці хопіць у іх сумлення прытрымлівацца новых правілаў?» і гэтак далей. Пытанні так і засталіся адкрытымі.
Мы спыталі ў прэс-сакратара Мінскага метрапалітэна Андрэя Кузьміна, ці абмяркоўвалася такое калі-небудзь у дачыненні да мінскага метро.
«Асобныя вагоны, мне здаецца, актуальныя для тых краін, дзе іх вырашаюць зрабіць па рэлігійных прычынах або з-за нераўнапраўя палоў, чаго ў нас няма. У Мінску гэта таксама было б немагчыма з тэхнічнага пункту погляду: у цягнікоў усяго пяць вагонаў. Але яны маюць спецыяльныя месцы для цяжарных жанчын і дзядуль з бабулямі. Калі ім не саступаюць месца, гэта ўжо праблема выхавання».
Дарэчы, адмысловыя вагоны для жанчын існуюць у многіх краінах: Японіі, Іране, Алжыры, Каіры, Бразіліі і інш. У першую чаргу яны створаны, каб бараніць ад сэксуальных дамаганняў, і мясцовыя ўлады нават штрафуюць мужчын, якія спрабуюць заскочыць у «жаночыя» вагоны.
