Даследчыкі адкрылі ў Афрыцы новы від прыматаў — ангольскага карлікавага галага з сямейства галагавых. Ягоная галоўная адметная рыса — гукі, якія ён выдае: нарастаючы шчокат, за якім ідзе шчабятанне. Пра гэта паведамляе gazeta.ru co спасылкай на часопіс American Journal of Physical Anthropology.
Фота: Elena Bersacola
Усяго было выяўлена 36 асобін. Пакуль навукоўцы даволі мала ведаюць пра іх лад жыцця і харчаванне. Галага жывуць у неахоўнай зоне, лясы, у якіх яны жывуць, знаходзяцца пад пагрозай. Ангола актыўна займаецца лесанарыхтоўкамі, так што асяроддзе пасялення галага можа зусім знікнуць.
Гэта пяты від прыматаў, адкрыты на тэрыторыі Афрыкі з 2000 года. Даследчыкі перакананыя, што на мацерыку яшчэ шмат невядомых відаў. Дзікія жывёлы ў Анголе вывучаныя мала — у прыватнасці, з-за грамадзянскай вайны, якая ішла тут з 1970 па 2002 год.
