Дыета, якая імітуе галаданне, спрыяе аднаўленню клетак падстраўнікавай залозы, сцвярджаюць амерыканскія даследнікі. Нізкакаларыйная дыета, якая складаецца з нізкавугляводных і нізкабялковых прадуктаў з высокім утрыманнем тлушчаў, «перазагружае» арганізм і актывуе ў клетках падстраўнікавай залозы механізм рэгенерацыі. На думку медыкаў, адкрыццё можа дапамагчы ў барацьбе з дыябетам, піша ВВС.
Getty
Даследаванне навукоўцаў з Універсітэта Паўднёвай Каліфорніі, апублікаванае ў часопісе Cell, заснаванае на эксперыментах над мышамі. Паддоследных марылі голадам на працягу некаторага часу, а затым вярталі да нармальнай дыеты.
Дыету выпрабоўвалі і на людзях — на працягу пяці дзён паддоследныя елі толькі нізкавугляводныя і нізкабялковыя прадукты з высокім утрыманнем тлушчаў, а затым на працягу 25 дзён ім дазвалялі есці ўсё, што заўгодна. Па задуме навукоўцаў, такі рэжым павінен імітаваць перыяды галадання.
Як заўважылі навукоўцы, у перыяд галадання ў клетках падстраўнікавай залозы ў мышэй актывізаваўся асаблівы механізм рэгенерацыі. Падобны працэс адбываецца ў ствалавых клетках, і медыкі ўжо досыць даўно тлумачаць яго існаванне здольнасцю чалавечых органаў часткова аднаўляцца.
Аднак да гэтага часу не было вядома, якім чынам можна задзейнічаць гэты механізм, і нікому не прыходзіла ў галаву звязваць яго актывізацыю з галаданнем.
«Мы прыйшлі да высновы, што калі давесці мышэй да стану крайняга стрэсу шляхам галадання, а затым, пакарміўшы, вярнуць назад у нармальны стан, у клетках падстраўнікавай залозы пачынае дзейнічаць нейкі механізм па перапраграмаванні клетак, які аднаўляе не функцыянуючыя часткі органаў», — каментуе даследаванне адзін з яго аўтараў, доктар Вальтэр Лонга.
«У навуковым сэнсе адкрыццё вельмі важнае: мы даказалі, што перапраграмаваць клеткі можна з дапамогай дыеты, не звяртаючыся да мадыфікацыі генаў», — дадае Лонга.
У медыцынскай сферы знаходка можа дапамагчы перш за ўсё ў барацьбе з дыябетам — у паддоследных мышэй рэзка выраўноўваўся ўзровень цукру ў крыві. Патэнцыйна такая дыета можа аднавіць утварэнне інсуліну ў арганізме чалавека, ліквідаваўшы прычыну хваробы.
