 |
Сёньня на пасяджэньні Цэнтральная выбарчая камісія пад кіраўніцтвам Лідзіі Ярміошынай было адмоўлена ў скарзе старшыні Менскай абласной арганізацыі партыі БНФ Зьмітра Вінаградава зь Мядзела.
Нагадаем, што 24 ліпеня Зьміцер Вінаградаў меўся падаць заяву аб рэгістрацыі сваёй ініцыятыўнай групы, але па дарозе зь Мядзелу да Вялейкі яго затрымалі супрацоўнікі міліцыі. Ахоўнікі правапарадку адвезьлі былога міліцыянта Вінаградава ў пастарунак. Афіцыйная прычына — падазрэньне ва ўгоне машыны. Палітыка пратрымалі ў міліцыі да 18:55, пасьля чаго адпусьцілі без складаньня ўсялякіх пратаколаў. А 19:00 канчалася падача дакумэнтаў на рэгістрацыю ініцыятыўных груп.
Сам Зьміцер Вінаградаў сёньняшняе рашэньне ЦВК пракамэнтаваў так: «Для мяне гэта абсалютна чакана і прагназуема. Гэта было ўжо зразумела па паводзінах нашых мясцовых уладаў. Цяпер падам скаргу ў Вярхоўны суд».
Вылучацца ад партыі БНФ Зьміцер Вінаградаў таксама ня можа, бо вялейская суполка партыі цяпер ня мае рэгістрацыі. Такім чынам, мядзельска-вялейскі рэгіён можа застацца на выбарах без дэмакратычнага кандыдата.
