У Мінскім гарадскім судзе 14 красавіка пачаўся працэс аб злоўжыванні службовымі паўнамоцтвамі. На лаве падсудных трое чыноўнікаў: былы намеснік міністра транспарту Яўген Рагачоў, былы першы намеснік начальніка БЧ Уладзімір Міхайлюк і намеснік генеральнага дырэктара прадпрыемства «Белінтэртранс» Белчыгункі Уладзіслаў Лембіеўскі.

Яўген Рагачоў

Усе яны былі затрыманыя яшчэ ў снежні 2015 года. Цяпер 43-гадоваму Рагачову і 33-гадоваму Лембіеўскаму пагражае да 10 гадоў.

Уладзімір Міхайлюк

58-гадовы Міхайлюк можа сесці на 6 гадоў.

Рагачоў заявіў хадайніцтва, каб у якасці абаронцы на працэс выклікалі яго бацьку, бо той «усё жыццё адпрацаваў на чыгунцы, добры спецыяліст і можа дапамагчы суду». Суддзя Ігар Любавіцкі, праўда, адхіліў хадайніцтва — Рагачоў-старэйшы былы чыгуначны начальнік, але ж юрыдычнай адукацыі не мае.

Асноўныя прэтэнзіі да Рагачова і кампаніі ў следства наступныя. Чыноўнікаў абвінавачваюць у «дапамозе» кампаніі «Сіфуд-сервіс», якая займалася транспарціроўкай грузаў і фактычна была канкурэнтам Беларускай Чыгункі.

Рагачоў, па версіі следства, уступіў у змову з кіраўніком «Сіфуд-сервіса» Віталём Петрукевічам.

Такім чынам, падчас сваёй працы на кіраўнічых пасадах пачынаючы з 2010 года Рагачоў імкнуўся дзейнічаць у інтарэсах Петрукевіча.

Спачатку Рагачоў кіраваў БТЛЦ (транспартна-лагістычным цэнтрам чыгункі). Пасля пайшоў у першыя намеснікі міністра транспарту, на пасадзе ў БТЛЦ яго змяніў Лембіеўскі.

Уладзіслаў Лембіеўскі

Лембіеўскага і Міхайлюка вінавацяць у змове з Рагачовым — яны дапамагалі яму ў «падтрымцы» кампаніі «Сіфуд-сервіс».

У прыватнасці, Рагачоў заключаў невыгадныя дамовы паміж «Сіфуд-сервісам» і Белчыгункай. Акрамя таго, чыноўнік намагаўся расфарміраваць рэфрыжэратарныя секцыі Белчыгункі. Частка рэфрыжэратарных вагонаў насамрэч была перададзена з вагоннага дэпо ў Маладзечне ў ведамства БТЛЦ, а адтуль — «Сіфуд-сервісу». У выніку гэтага прыйшлося скараціць каля 50 рабочых Белчыгункі.

Прасцей кажучы, следства мяркуе, што Рагачоў дапамагаў «Сіфуд-сервісу» стаць манапалістам у галіне перавозкі грузаў, якія хутка псуюцца і для якіх патрэбныя рэфрыжэратарныя вагоны. Для гэтага ён расфарміроўваў адпаведнае падраздзяленне на Белчыгунцы і перадаваў вагоны кампаніі свайго знаёмага Віталя Петрукевіча. Дапамагалі намесніку міністра яго падначаленыя: першы намеснік начальніка БЧ Уладзімір Міхайлюк і намеснік генеральнага дырэктара «Белінтэртранса» (БТЛЦ) Уладзіслаў Лембіеўскі.

Пацярпелымі па справе праходзяць рабочыя чыгункі, якіх скарацілі ў выніку дзеянняў чыноўнікаў: агулам больш за 40 чалавек. На пасяджэнне прыйшлі пяцёра з пацярпелых.

Уладзімір Міхайлюк, дарэчы, яшчэ абвінавачваўся ў «псаванні зямлі». Ля свайго дома пад Мінскам ён незаконна выкапаў два штучныя вадаёмы. Але шкода дзяржаве была кампенсаваная.

Таксама, прычым у трохразовым памеры, Міхайлюком была кампенсаваная шкода, нанесеная дзяржаве ў сувязі са злоўжываннем службовымі паўнамоцтвамі.

Клас
Панылы сорам
Ха-ха
Ого
Сумна
Абуральна

Хочаш падзяліцца важнай інфармацыяй ананімна і канфідэнцыйна?

Каб пакінуць каментар, калі ласка, актывуйце JavaScript у наладах свайго браўзеру