БАТЭ не даваў разьвярнуцца ў атацы баўгарскім форвардам.
Чэмпіён Беларусі не стамляе зьдзіўляць сваім сёлетнім выступам у Лізе чэмпіёнаў. Спачатку перамога на клясе над ісьляндзкім «Валюрам», пасьля супрацьстаяньне бэльгійскім «Андэрлехтам», дзе каманда ні на імгненьне не дала засумнявацца ў сваёй перавазе, а цяпер гасьцявы выйгрыш у баўгарскага «Леўскага»!
Увогуле, у баўгараў перад матчам дамінаваў шапказакідальніцкі настрой. Ну калі не буйная перамога, то 2:0, дык дакладна пераможам. Пра тое казаў нават трэнэр «Леўскага» Веліслаў Вуцаў. Сапраўды, БАТЭ гэта ж толькі «завадзкая каманда з штучнай створанай дзяржавы», дадаваў прэзыдэнт клюбу Тодар Баткаў. За такія адносіны да БАТЭ баўгары і паплаціліся.
Ужо зь першых хвілін было бачна, што «Леўскі» нашмат мацней за той жа «Андэрлехт». Баўгары, якіх заклікалі ісьці ў атаку шматлікія фанаты, ня злазілі з чужой палавіны поля. Удары з рознымі ступенямі цяжкасьці сыпаліся на Сяргея Верамка. Але наш галкіпэр зьдзіўляў сваім спакоем. Здаецца, што ягоная ўпэўненасьць перадалася і астатнім гульцам.
Зрэшты, на 30‑ай хвіліне той самы Верамко і Казанцаў не даглядзелі за форвардам «Леўскага», і варатар быў вымушаны парушыць правілы. Мала таго, што швэдзкі арбітар прызначыў пэнальці, дык яшчэ пакараў нашага кіпэра папярэджаньнем. Цяпер Верамко дакладна не сыграў праз два тыдні зь «Леўскім» у Менску. Страта вельмі адчувальная.
Падчас прабіцьця пэнальці баўгарскія тэлевізійнікі нават не далі як сьлед пахвалявацца за нашых. Момант удару апэратар недаравальна празяваў. Але, на наша шчасьце, Вяромка выправіў сваю ж памылку — такі адбіў удар Георгі Іванова.
 |
А яшчэ празь імгненьне нейкіх сантымэтраў не хапіла БАТЭ, каб мяч дайшоў да Віталя Радзівонава, і той выйшаў адзін на адзін з брамнікам. Па справядлівасьці скажам, што поўнай перавагай у першым тайме валодалі баўгары, а ў беларусаў мяч не трымаўся.
Другі тайм стартаваў больш спакойна. «Леўскі» звыкла атакаваў, а Вяромка звыкла працягваў штампаваць адбітыя ўдары. Ну а на 60‑ай хвіліне здарылася непапраўнае для гаспадароў. Ідэальны навес з вуглавога Сяргея Крыўца, расейскі легіянэр БАТЭ Ўладзімер Ржэўскі перавісеў усіх у паветры і трапна ўдарыў галавой. Мяч адскочыў ад газону і варатар быў бясьсільны — 1:0!
Чамусьці у апошнюю паўгадзіны гульні не было сумневаў, што БАТЭ вытрымаў штурм «Леўскага», пакарае каманду за яе пагардлівае стаўленьне да супернікаў. Так яно і атрымалася.
Самы малады трэнэр у гісторыі беларускага футболу Віктар Ганчарэнка працягвае сваё трыюмфальнае эўрапейскае шэсьце.
Напэўна, ніколі ад часоў менскага «Дынама» другой паловы 1980‑ых гадоў не было такога кайфу назіраць за нашымі камандамі ў эўракубках. Да групавога турніру Лігі чэмпіёнаў ужо рукой падаць. Застаўся апошні, але самы складаны матч. 27 жніўня. Менскі стадыён «Дынама».Брава, БАТЭ! І посьпехаў!
 |
***
Дэрбі «усяе СССР», як называлі матч між маскоўскім «Спартаком» і кіеўскім «Дынама» расейскія журналісты, прайшоў у Маскве. Кіяўляне разграмілі віцэ‑чэмпіёна Расеі — 4:1. Два галы на рахунку былога нашага суайчыньніка Арцёма Мілеўскага.
