Крыніца ў Адміністрацыі прэзідэнта Беларусі пацвердзіла БелаПАН інфармацыю аб тым, што 15 жніўня Аляксандр Лукашэнка падпісаў указ аб памілаванні Аляксандра Казуліна.
Экс-кандыдат у прэзідэнты Аляксандр Казулін быў асуджаны 13 ліпеня 2006 года. Яго прызналі вінаватым у наўмысных дзеяннях, якія груба парушаюць грамадскі парадак і спалучаны з непадпарадкаваннем супрацоўнікам міліцыі. Палітыка прыгаварылі да пазбаўлення волі на пяць з паловай гадоў, аднак сам ён катэгарычна не прызнае сваёй віны і неаднаразова заяўляў, што не мае намеру прасіць аб памілаванні.
16 жніўня А.Казуліна вызвалілі з калоніі "Віцьба-3". Паводле слоў дочкі палітыка Вольгі, падставай для вызвалення стала смерць цесця Казуліна Івана Сабалеўскага, які памёр сёння раніцай. Пахаванне адбудзецца 17 жніўня ў Дзяржынску. Там жа цяпер знаходзіцца А.Казулін. Падрабязнасці вызвалення сваякі і паплечнікі палітыка не каментуюць.
Як заявіў БелаПАН юрыст і былы адвакат А.Казуліна Ігар Рынкевіч,
згодна з беларускім заканадаўствам для вырашэння пытання аб памілаванні прызнанне зняволеным сваёй віны не з\'яўляецца абавязковай умовай.
Паводле слоў юрыста, артыкул 84 Канстытуцыі адносіць пытанне аб памілаванні асуджаных да распараджэння прэзідэнта і з\'яўляецца нормай прамога дзеяння. "Ужо адна такая фармулёўка юрыдычна дазваляе Лукашэнку дзейнічаць па тым варыянце, які ён палічыць патрэбным", — сказаў Рынкевіч.
Акрамя таго, зазначыў ён, існуе зацверджанае ўказам прэзідэнта палажэнне аб парадку ажыццяўлення памілавання. Яно прадугледжвае наяўнасць асабістага хадайніцтва асуджанага, якое разглядаецца спецыяльнай камісіяй (яе ўзначальвае намеснік кіраўніка Адміністрацыі прэзідэнта Наталля Пяткевіч). Аднак камісія мае дарадчы характар, яе роля ў прыняцці рашэння нязначная.
"Такім чынам, рашэнне аб памілаванні — гэта палітычная воля Лукашэнкі. Патрабаванне ад Казуліна прызнаць віну не можа выносіцца як абавязковая ўмова для памілавання",— заявіў юрыст. Пры гэтым ён падкрэсліў, што пазіцыя А.Казуліна застаецца нязменнай — палітык па-ранейшаму лічыць сябе невінаватым.
