Шчасьлівая лічба Слэвіна (Lucky Number Slevin)
ЗША, 2006, каляровы, 109 хв.
Жанр: Крымінальная драма
Адзнака: 7,5 (з 10)
Небараку Слэвіна прымаюць за зьніклага сябра, які вінен мафіі вялікія грошы. У якасьці аплаты пазыкаў Слэвіну прапануюць забіць сына аднаго з гангстэраў…
Крымінальная драма Пола Макгігана ўдала грае на супярэчнасьцях: кожны герой ня той, кім здаецца. Кіраўнік негрыцянскай мафіі (Морган Фрымэн) – ветлівы шахматыст, ягоны канкурэнт (Бэн Кінгсьлі) – гангстэр-рабін (!), а легкадумная суседка героя – мэдычны экспэрт і аматарка вышукаў.
У гэтай кампаніі Слэвін (Джош Хартнэт) – зусім не трагікамічны расьцяпа, як можна было меркаваць. Недарэчнасьці завершацца жорсткай расплатай – і толькі Брус Уіліс (прафэсійны кілер "Добры сабака") прадэманструе намёкі на прабачэньне.
Пол Макгіган вядомы глючным "Кіслотным домам", але ў гэтай карціне рэжысэр псыхадэлічнымі вымудрыкамі не злоўжывае. Уся ўвага – трапным пэрсанажам-маскам і ўдалым сюжэтным падстаноўкам.
Макгігана папракалі, што ён не такі мізантроп – як Тарантына, і не такі гуманіст – як Хічкок. Але забаўляльнае кіно ён робіць з годнасьцю.
Андрэй Расінскі
