Сірыйскае дзяржаўнае тэлебачанне паказала месца выбуху.
Нападнік-самагубца падарваў свой аўтамабіль у сталіцы Сірыі пасля таго, як быў аточаны паліцыяй, - паведамляе ВВС са спасылкай на дзяржаўнае тэлебачанне. Па меншай меры восем чалавек загінулі.
Яшчэ па меншай меры 12 чалавек атрымалі раненні.
Сірыйская паліцыя пераследвала тры аўто, уладальнікаў якіх падазравалі ў тым, што яны рыхтуюць напады. Дзве машыны ўдалося затрымаць і абясшкодзіць выбухоўку, а кіроўца трэцяй машыны падарваў сябе пасля таго, як зразумеў, што аточаны.
Паводле дзяржаўнага тэлебачання, нападнікі планавалі падарваць машыны ў людных месцах сталіцы ў першы працоўны дзень пасля завяршэння Рамадана.
Мясцовы карэспандэнт AFP паведаміў, што пачуў аўтаматную страляніну каля шасці раніцы, а пасля - выбух, ад якога вылецела шкло ў вокнах суседніх дамоў.
Пакуль ніхто не ўзяў адказнасць за напады.
Канфлікт у Сірыі доўжыцца ўжо шэсць гадоў. Сталіца краіны, Дамаск, знаходзіцца пераважна пад кантролем урадавых сіл.
Ад 2011 года, калі ў Сірыі пачаліся антыўрадавыя пратэсты, у канфлікце загінулі больш за 300 тысяч чалавек.
Паводле звестак ААН, каля 5,5 млн сірыйцаў пакінулі краіну, яшчэ 6,3 млн лічацца ўнутрана перамешчанымі асобамі.