Экс-кандыдат на пасаду прэзыдэнта і палітвязень Аляксандар Казулін адказаў на пытаньні наведвальнікаў аднаго з найбольш папулярных расейскіх сайтаў www.lenta.ru.
Чытачоў парталу найбольш цікавілі далейшыя беларуска-расейскія адносіны.
Казулін адказваў на пытаньні сьцісла і канкрэтна — ня так мнагамоўна, як на мінулым тыдні падчас прэс-канфэрэнцыі ў Менску.
Вось як ён адказаў на пытаньне пра ўвядзеньне расейскага рубля: «Гэта можа быць небясьпечным для сувэрэнітэту і незалежнасьці Беларусі на дадзеным этапе, з другога боку можа быць вельмі нават аздараўляльным для эканомікі. Усё залежыць ад палітычных мэтаў».
Ці скончылася ў Беларусі палітыка русіфікацыі, пытаюцца ў Казуліна: «Так, гэтая палітыка, якая пачалася ў ХІХ стагодзьдзі, прыпыненая. Зараз ідзе складаны працэс стварэньня беларускай нацыі, таму ня слушна весьці гаворку пра дэнацыяналізацыю беларусаў. Прашу не трактаваць гэтыя працэсы як варожыя для расейскага народу», – кажа былы палітвязень.
Разам з тым, Аляксандар Казулін кажа пра немагчымасьць стварэньня саюзнай дзяржавы на ўзор СССР.
«У тым выглядзе, што саюз знаходзіцца зараз, я ня бачу пэрспэктываў для разьвіцьця», – кажа Казулін. Ён называе сёньняшнюю беларускую ўладу фармальна прабеларускай, але фактычна, якая залежыць ад волі Крамля.
Папалохаў Казулін расейскую публіку і нацыяналістамі, як гэта любіць рабіць і Лукашэнка.
«Дастаткова доўга тэрмін беларуская і расейская мова будуць заставацца дзяржаўнымі.
Я паважаю спадара Пазьняка, але не падзяляю ягоныя погляды ў адносінах да Расеі і расейцаў».
