Міністэрства адукацыі вырашае, якімі будуць уступныя экзамены ў гімназіі. «Магчыма, гэта будзе незалежны экзамен пасля 9 класа, магчыма, рашэнне будзе іншым», — паведаміла намеснік міністра адукацыі Раіса Сідарэнка падчас анлайн-канферэнцыі на сайце Белтэлерадыёкампаніі.
— Гаворка ідзе пра тое, што сёння, калі дзіця паступае ў 5-ы клас гімназіі, гэта не яго выбар неабходнасці вывучэння прадметаў на павышаным узроўні, а хутчэй за ўсё, жаданне бацькоў. Часам жаданне, часам амбіцыі, — распавяла Раіса Сідарэнка. — Таму сёння мы гаворым аб мэтазгоднасці правядзення гэтых экзаменаў менавіта перад паступленнем у 5 клас. Імаверна, іх трэба перанесці на іншы этап, калі дзеці свядома разумеюць, будуць яны вывучаць на павышаным узроўні фізіку або філалогію, што ім больш прымальна, зразумела, цікава, з перспектывай на далейшае навучанне ў ВНУ.
Па словах намесніка міністра, «гэта пытанне абмяркоўваецца, якое будзе рашэнне прынята, у бліжэйшы час мы давядзём да ўсіх гэтую інфармацыю».
Адзін з варыянтаў, які цяпер абмяркоўваецца, — у гімназію будуць залічвацца па выніках незалежнага экзамена. Ён заменіць цяперашнія экзамены, якія здаюць дзевяцікласнікі — прымаць яго будуць педагогі, якія не працуюць у школе, дзе вучыцца дзіця.
— Калі ў цябе не ніжэй за 7 ці 8, то ты можаш ісці ў гімназію, — патлумачыла Раіса Сідарэнка. — Магчыма, так. Магчыма, рашэнне будзе іншым.
Намеснік міністра ўпэўненая, што «іспыты ў 5 клас гімназіі і час іх правядзення не становяцца гарантыяй, што дзеці, якія здаюць іх на 9 і 10, у 7-м класе не стануць атрымліваць зусім іншыя адзнакі». Акрамя таго, у міністэрстве лічаць «вельмі няправільным», што ў 4 класе школы на ўроках рускай, беларускай, матэматыкі часам займаюцца не па падручніку, а рыхтуюцца да паступлення ў гімназію.
Пра тое, што ў краіне трэба мяняць сістэму паступлення ў гімназіі, заявіў міністр адукацыі Ігар Карпенка, прадстаўляючы на рэспубліканскай педрадзе канцэпцыю развіцця адукацыі.
