Ва ўзбекскім горадзе Харэзм у ноч з 26 на 27 жніўня ў рамках мерапрыемства «Тун» («Ноч») былі затрыманыя 3706 чалавек за тое, што яны «бязмэтна гулялі» па вуліцы ў начны час сутак. У мерапрыемстве па затрыманні прымалі ўдзел міліцыя, супрацоўнікі пракуратуры, судоў і прадстаўнікі мясцовай адміністрацыі, паведамляе мясцовае аддзяленне «Радыё Свабода».
Выраз «бязмэтна гулялі» прыводзіцца ў афіцыйным паведамленні абласнога ўпраўлення МУС. Затрыманні людзей пачаліся 26 жніўня пасля дзевяці вечара. Па словах супрацоўніка прэс-службы МУС Узбекістана, вялікая частка затрыманых была арыштаваная на суткі, і адпушчаная пасля прыцягнення да штрафу ў якасці правапарушальнікаў. З астатнімі былі праведзеныя прафілактычныя гутаркі.
Аднак супрацоўнік прэс-службы МУС не змог удакладніць, на падставе якога правапарушэння грамадзяне былі прыцягнутыя да адміністрацыйнага штрафу.
«Згодна з заканадаўствам Узбекістана, «бязмэтнае вулічнае гулянне» не лічыцца злачынствам або правапарушэннем. Калі толькі ў краіне не пачалася вайна, і не было абвешчанае надзвычайнае становішча або каменданцкая гадзіна. Любы грамадзянін мае права ў любы час сутак шпацыраваць па горадзе з якой-небудзь мэтай або бязмэтна», — сказаў у каментары выданню адзін з узбекскіх адвакатаў на ўмовах ананімнасці.
Ва УУС Харэзмскай вобласці таксама не змаглі растлумачыць, які менавіта закон Узбекістана забараняе грамадзянам краіны «бязмэтна гуляць у начны час сутак». Пры гэтым там адзначылі, што «добрыя людзі не ходзяць па вуліцы ў начны час».
Тым не менш, у МУС прызналі, што супрацоўнікі харэзмскай міліцыі перавысілі свае паўнамоцтвы і парушылі правы грамадзян. Там заявілі, што харэзмская міліцыя памылілася.
«Я спадзяюся, што ў будучыні супрацоўнікі УУС Харэзмскай вобласці не будуць дапускаць такія памылкі. Але з іншага боку, у тую ноч былі затрыманыя чатыры чалавекі, якія знаходзіліся ў вышуку», — паведаміў прадстаўнік МУС Узбекістана.
