Суд Першамайскага раёна Віцебска 1 верасня разгледзеў адміністрацыйную справу ў дачыненні да 35-гадовай жанчыны, якая стала гераіняй рэзананснага скандалу ў гарадской аптэцы.
Абвінавачаная Марына Паяркова і пацярпелы, загадчык аптэкі Максім Самсонаў, у судзе сядзелі на адной лаве, за паўметра адзін ад аднаго.
Жанчыну абвінавацілі ў здзяйсненні правапарушэнняў, прадугледжаных арт. 9.3 (Абраза) і арт. 17.1 (Дробнае хуліганства) КаАП Беларусі. Адказнасць па першым артыкуле - штраф у памеры ад 4 да 20 базавых велічынь, па другой — штраф ад 2 да 30 базавых велічынь або адміністрацыйны арышт.
У Паярковай сярэдняя адукацыя, працуе рэтушыроўшчыцай
— Я прызнаю сваю віну, шчыра прашу прабачэння перад пацярпелым, — сказала яна ў судзе. — Я чалавек запальчывы, і ў гэтай сітуацыі паводзіла сябе непрыгожа (…) раскайваюся, бачыла сябе з боку на відэа з аптэкі, як гэта выглядала. Але і мяне потым абразілі тысячы людзей.
Максім Самсонаў у судзе заявіў:
— У сувязі з прынесенымі выбачэннямі гатовы прымірыцца.
У сувязі з прымірэннем бакоў справу па арт 9.3 (Абраза) суд закрыў. Па другім артыкуле віцяблянку аштрафавалі на 16 базавых велічыняў — 368 рублёў. Разгляд справы заняў менш за паўгадзіны.
Пасля працэсу Максім Самсонаў распавёў, што абвінавачванне па арт. 17.1 ініцыявала міліцыя, па артыкуле 9.3 яго папрасілі напісаць заяву праваахоўнікі.
