На мінулым тыдні фрагмэнт сьцяны зьнесьлі. На тым месцы будуць будаваць гатэль адной з сусьветных сетак.
На мінулым тыдні фрагмэнт сьцяны зьнесьлі. На тым месцы будуць будаваць гатэль адной з сусьветных сетак.
«Сьцяна Цоя» зьявілася ў Менску як і ў большасьці вялікіх гарадоў былога СССР амаль адразу пасьля сьмерці рок-музыканта. Прыхільнікі лідэра «Кіно» Віктара Цоя прыстасавалі пад яе ўчастак доўгай бэтоннай агароджы вакол будоўлі Палацу Рэспублікі.
У 1992 годзе, як распавядае музыка Аляксандар Памідораў, менская мастачка Кацярына Багушэвіч, якая, дарэчы, паходзіць з тых самых Багушэвічаў, выкупіла два фрагмэнты бэтоннага будаўнічага плоту. «Кацярына заплаціла за кожны фрагмэнт па 100 новых беларускіх рублёў, тых, што з зубрамі» — прыгадвае сп. Памідораў.
У 1997 годзе, калі завяршылася будаўніцтва палацу, паўстала пытаньне зносу агароджы. Выкупленыя фрагмэнты «сьцяны Цоя» былі прыватнай уласнасьцю, таму іх захавалі. Гарадзкія ўлады пайшлі насустрач прыхільнікам Цоя і далі дазвол на перанос рэшты «сьцяны» на вуліцу Інтэрнацыянальную. Кожны дзень каля яе зьбіралася моладзь. Прыхільнікі «Кіно» спадзяюцца на тое, што гарадзкія ўлады і гэтым разам пойдуць ім насустрач і выдзеляць месца пад новую «сьцяну».
Выпадак зь менскай «сьцяной» не адзінкавы. У той жа Расеі «сьцены Цоя» часьцяком робяцца аб’ектамі атакаў гарадзкіх уладаў альбо з боку прадстаўнікоў канкурэнтных моладзевых субкультураў.
Музыка і паэт Віктар Цой загінуў 15 жніўня 1990 года ў аўтакатастрофе недалёка ад Рыгі, пахаваны на Багаслоўскіх могілках Пецярбурга. На творчасьці гурта «Кіно» ўзгадавалася не адно пакаленьне моладзі на постсавецкай прасторы.
Цяпер чытаюць
Як склаўся лёс выпускнікоў, якімі журфак ганарыўся 10 гадоў таму? Гісторыя аднаго ўрачыстага калажа29
Каментары