ЗША вырашылі выслаць 15 кубінскіх дыпламатаў, заявіўшы, што кубінскія ўлады не змаглі забяспечыць абарону работнікаў амерыканскага пасольства ў Гаване ад загадкавых акустычных уздзеянняў, паведамляе ВВС.
Міністр замежных спраў Кубы Бруна Радрыгес назваў гэта рашэнне непрымальным.
Гэты крок з боку дзяржаўнага дэпартамента ЗША рушыў услед за адкліканнем большай часткі супрацоўнікаў амерыканскай амбасады ў кубінскай сталіцы.
Больш за 20 амерыканскіх супрацоўнікаў амбасады пацярпелі ад загадкавых акустычных нападаў за апошнія некалькі месяцаў.
«Гэта рашэнне было прынятае ў выніку няздольнасці Кубы прыняць неабходныя меры па абароне нашых дыпламатаў у адпаведнасці са сваімі абавязальніцтвамі па Венскай канвенцыі. Гэты крок забяспечыць роўнасць у нашых дыпламатычных сувязях», — гаворыцца ў заяве дзяржсакратара ЗША Рэкса Тылерсана, выпушчанай у аўторак.
Кубінскім дыпламатам далі сем сутак на зборы. Міністр замежных спраў Кубы назваў гэта рашэнне неапраўданым.
