«Польшча лічыць, што Тадэвуш Касцюшка — герой як Польшчы, так і Літвы, Беларусі і ЗША, універсальны герой чалавецтва, а не выключна «сын Беларусі» або «польскі генерал», — гаворыцца ў адказе МЗС Польшчы на пытанне Радыё Свабода.
У лісце міністэрства тлумачыць, што ад самага пачатку вельмі пазітыўна паставілася да ідэі паставіць ў Залатурне (Швейцарыя) супольны помнік Тадэвушу Касцюшку як герою Польшчы, Беларусі, Літвы і многіх народаў.
Помнік Касцюшку, паводле МЗС, быў вялікім шанцам на супольную польска-беларускую ініцыятыву.
Паводле замежнапалітычнага ведамства Польшчы, амбасада ў Берне вяла перамовы з ініцыятарамі праекта — Таварыствам беларусаў Швейцарыі.
«Прапанова польскага боку — размясьціць на помніку толькі шыльду з імем і прозвішчам Тадэвуша Касьцюшкі. Прапановаю беларускага боку была шыльда «Тадэвуш Касьцюшка — сын Беларусі».
Гэтая шыльда не ўзгадвала пра якія-небудзь сувязі Касьцюшкі з Польшчай, для польскага боку гэта было непрымальна» — гаворыцца ў адказе МЗС.
Амбасада Польшчы ў Берне паведаміла, што прапаноўвала супольнае адкрыцьцё помніка дыпламатамі Польшчы, Беларусі і Літвы. «Беларускі бок нечакана выйшаў з перамоваў без паведамлення прычынаў, а пасольству Польшчы ў Берне паведамілі, што беларускі бок самастойна правядзе ўрачыстасць, што нас засмучае», — напісана ў лісце МЗС Польшчы.
21 кастрычніка ў горадзе Залатурн у Швейцарыі мае адбыцца адкрыццё помніка Тадэвушу Касцюшку. Ініцыятыва ўшанавання героя Беларусі, Польшчы і ЗША належыць швейцарскім беларусам.
Напярэдадні адкрыцця стала вядома, што польскія дыпламаты дамагліся ад уладаў горада, каб тыя прыбралі з помніка згадкі пра Беларусь.