«Сітуацыя на Карэйскім паўвостраве дасягнула крытычнай адзнакі, і ядзерная вайна можа пачацца ў любы момант», — з такім папярэджаннем выступіў намеснік пастаяннага прадстаўніка КНДР у ААН Кім Ін Рэн на пасяджэнні Генеральнай Асамблеі сусветнай арганізацыі у аўторак, паведамляе DW.
Дыпламат сцвярджаў, што ні адна іншая краіна гэтак доўгі час не падвяргалася «настолькі экстрэмальнай і непасрэднай ядзернай пагрозе з боку ЗША», як КНДР, і таму Пхеньян мае поўнае права на самаабарону. У гэтай сувязі ён нагадаў аб тым, што ўся кантынентальная частка ЗША знаходзіцца ў межах дасяжнасці агнявой моцы Паўночнай Карэі.
Па словах Кім Ін Рэна, яго краіна прынцыпова падтрымлівае ідэю поўнай ліквідацыі ядзернай зброі. Аднак ва ўмовах, калі КНДР падвяргаецца пагрозе з боку ЗША, яна не можа падпісаць дагавор аб забароне ядзернай зброі. Пхеньян лічыць, што ў інтарэсах ядзернага раззбраення «краіны, якія валодаюць найбуйнейшымі ядзернымі арсеналамі, павінны першымі іх ліквідаваць, адмовіцца ад агрэсіўных дактрын, у тым ліку заснаваных на нанясенні прэвентыўнага ўдару, а таксама вывезці ядзерную зброю, размешчаную за межамі іх уласнай тэрыторыі».
Намеснік дзяржсакратара ЗША Джон Саліван у адказ на папярэджанне Кім Ін Рэна заявіў, што яго краіна не выключае прамых перамоваў з КНДР. «Мы, вядома, не выключаем магчымасці прамых перамоваў з Паўночнай Карэяй. У справе ўрэгулявання праблемы, выкліканай КНДР, наша ўвага сфакусаваная на дыпламатыі, аднак на выпадак правалу дыпламатыі мы і нашы саюзнікі ў Японіі, Паўднёвай Карэі і іншых краінах павінны быць гатовыя да самага горшага», — сказаў ён у ходзе візіту ў Токіо.
Раней дзяржсакратар ЗША Рэкс Тылерсан у інтэрв'ю тэлекампаніі CNN таксама заявіў, што ЗША прыкладаюць дыпламатычныя намаганні з мэтай урэгулявання канфлікту вакол ракетна-ядзернай праграмы Паўночнай Карэі. Ён дадаў, аднак, што «гэтыя дыпламатычныя намаганні будуць працягвацца да таго часу, пакуль не ўпадзе першая бомба».
