Слуцкім раённым аддзелам Следчага камітэта завершана расследаванне крымінальнай справы аб разбойным нападзе.
Абвінавачанымі па крымінальнай справе прызнаныя два 19-гадовыя жыхары Магілёўскай вобласці. У чэрвені яны вырашылі «зарабіць» на даверлівасці жыхара Слуцка.
Абодва маладыя чалавекі нідзе не працавалі. Адзін з іх у інтэрнэце пазнаёміўся з мужчынам і прапанаваў яму купіць алкаголь. Падчас тэлефонных размоў дамовіліся, што прадавец прывязе пакупніку ў Слуцк 30 скрыняў гарэлкі па 20 бутэлек у кожнай.
Для рэалізацыі задумы хлопцы нават арандавалі мікрааўтобус у Мінску, а ў якасці кіроўцы прыцягнулі трэцяга знаёмага (пра далейшы намер парачкі той не ведаў).
На пад'ездзе да Слуцка мікрааўтобус зламаўся, і пацярпелы, каб забраць тавар, пад'ехаў да маладых людзей са сваім знаёмым. Падчас сустрэчы падазраваныя завабілі пакупніка ў фургон пад падставай дэманстрацыі прадукцыі і, пагражаючы пнеўматычным пісталетам, забралі ў яго 230 рублёў.
Праўда, неўзабаве хлопцаў затрымалі.
У ходзе следства абвінавачаныя давалі супярэчлівыя паказанні. Напрыклад, сцвярджалі, што парушылі закон, каб зняць відэапранк. У далейшым яны нібыта мелі намер вярнуць грошы пацярпеламу і папрасіць прабачэння, калі скончаць здымку.
«Праведзенымі ператрусамі, вочнымі стаўкамі, вынікамі экспертыз наконт канфіскаваных прадметах, у ліку якіх зброя, нож, мабільныя сродкі сувязі, і іншымі сабранымі доказамі іх довады следствам былі абвергнутыя», — паведамляе СК.
Цяпер «пранкераў»-няўдачнікаў чакае суд. Ім пагражае да 15 гадоў пазбаўлення волі.
