Расійскае інфармацыйнае агенцтва «Рэгнум» накіравала вельмі рэзкі адкрыты ліст да пасла Расіі ў Беларусі Аляксандра Сурыкава.
Ужо ў першым абзацы гаворыцца, што рэдакцыя адмаўляецца называць Сурыкава «паважаным». Справа ў тым, што дзесьці год таму Сурыкаў дастаткова рэзка выказаўся па справе публіцыстаў «Рэгнума», якія апынуліся за кратамі.
«Вельмі радыкальныя журналісты», — так пасол ахарактаразаваў Юрыя Паўлаўца, Дзмітрыя Алімкіна і Сяргея Шыптэнку.
«Гэтым сваім публічным выступам вы, як паказаў час, фактычна ўхвалілі і далі адмашку той, мякка кажучы, істэрыі, за якой ужо замацаваліся такія тэрміны, як «справа беларускіх дзекабрыстаў», — пішуць «рэгнумаўцы».
«Вы падставілі ваша ведамства, вы падставілі МЗС Расіі і яго афіцыйнага прадстаўніка. Вы падставілі нашу з Вамі краіну — Расію», — гаворыцца ў звароце.
Напрыканцы ліста паслу Сурыкаву выказаны пратэст: «Спадар пасол, вам усё ж такі 77 гадоў. Ці не пара вам на супакой і на пакаянне?»
Прысуд па справе публіцыстаў «Рэгнума» будзе вынесены 2 лютага ў Мінскім гарадскім судзе.
