Ізраільскі вайсковец на Галанскіх вышынях, на мяжы з Сірыяй, 10 лютага. Фота: Gil Eliahu. Haaretz.com
Адміністрацыя Трампа выступіла з падтрымкай дзеянняў Ізраіля, які напярэдадні нанёс шэраг авіяўдараў па тэрыторыі Сірыі, перадае РБК. Заяву Белага дома цытуе Haaretz.
«Ізраіль — верны саюзнік Злучаных Штатаў, і мы падтрымліваем яго права на абарону ад сірыйскай арміі і апалчэнцаў, якіх падтрымлівае Іран, на поўдні Сірыі. Мы заклікаем Іран і яго саюзнікаў спыніць правакацыйныя дзеянні і пачаць працаваць над дасягненнем міру ў рэгіёне», — гаворыцца ў заяве.
Раней з падтрымкай Тэль-Авіва пасля абмену ўдарамі паміж Ізраілем і Сірыяй выступіў Дзярждэп і Пентагон. Пры гэтым амерыканскія ваенныя заявілі, што не маюць дачынення да інцыдэнту.
У ноч з 9 на 10 лютага ВПС Ізраіля збілі беспілотнік, які парушыў межы краіны. У Тэль-Авіве заявілі, што ён належаў Ірану і быў запушчаны з тэрыторыі Сірыі. Пасля гэтага ізраільскія самалёты нанеслі ўдар па шэрагу аб'ектаў у суседняй дзяржаве. Агнём у адказ сірыйскія сілы СПА збілі адзін з самалётаў, які ўдзельнічаў у атацы, знішчальнік F-16.