Гэта мая асабістая канцэпцыя, якая нарадзілася пасля #БНР100 «Свята Незалежнасці» і зараз сфармавалася ў больш-менш дакладны выгляд. Цікава будзе пачуць вашыя думкі і меркаванні наконт яе, каб разумець, у якім кірунку рухацца пры планаванні мерапрыемстваў у наступным годзе.

Дзень Беларусі!

Лічу, што найлепшай агульнай назвай для 25 сакавіка будзе — Дзень Беларусі #belarusday. У нас ёсць некалькі афіцыйных і неафіцыйных Дзён Незалежнасці і блізкіх да яго, ёсць ужо шматгадовы «Дзень Волі». Але гэта ўсё не тое. Па факту 25 сакавіка — гэта своеасаблівы Дзень нараджэння Беларусі, дзень пачатку фармавання сучаснай Беларусі, яе дзяржаўнасці, дзень, з якога пачалася новая гісторыя Беларусі.

Гэта простая і прыгожая форма, якая можа ўвасабляцца ў разнастайных варыяцыях. І з улікам таго, што галоўны вокліч беларусаў «Жыве Беларусь», а жыць Беларусь пачала якраз 100 гадоў назад, у тыя часы, дарэчы, і з’явіўся гэты вокліч. Ды і адказ на гэты вокліч «Жыве вечна!» цяпер гучыць больш упэўнена, бо Беларусь (менавіта Беларусь, а не ВКЛ, Рэч Паспалітая, Полацкае княства) дакладна ўжо стагоддзе жыве.

Таму першая прапанова такая:

пачаць кампанію па прызнанні 25 сакавіка дзяржаўным святам і святочным днём з формай назвы «Дзень Беларусі», і паралельна міжнародную кампанію па папулярызацыі 25 сакавіка як Міжнароднага дня Беларусі з кароткай назвай «Belarus day».

З гэтай канцэпцыі можа пачацца яскравая і шырокая кампанія, якая будзе папулярызаваць Беларусь на розных узроўнях.

На міжнародным узроўні правядзенне ў гэтыя дні шматлікіх акцый і мерапрыемстваў пад агульнай назваю «Belarus day», прысвечаных Беларусі: дыяспарамі і беларускімі супольнасцямі, арганізацыямі (што ўжо і так адбываецца шмат гадоў), кампаніямі з беларускім капіталам ці створанымі беларусамі, прадстаўніцтвамі ў розных краінах, дыпламатычнымі ўстановамі і дзяржаўнымі структурамі.

100-годдзе БНР паказала, што мы, беларусы, на гэта здольныя, і сотні мерапрыемстваў у розных кутках свету пра гэта сведчаць.

Калі дзяржава будзе супрацьстаяць і не падтрымліваць такія ініцыятывы, то ўсё адно праз грамадскія ініцыятывы і міжнародныя арганізацыі дамагацца прызнання статуса гэтага дня з запускам акцыі «Павіншуй Беларусь з днём нараджэння», каб як звычайныя грамадзяне розных краін, так і палітыкі ды кіраўнікі розных дзяржаў масава віншавалі як беларусаў, так і кіраўніцтва краіны на розных узроўнях з гэтым днём.

25 сакавіка павінен стаць днём, калі ў свеце гавораць пра Беларусь, віншуюць Беларусь, знаёмяцца з Беларуссю, прыязджаюць ці па выніку плануюць прыезд у нашую краіну.

Што ў самой Беларусі можа адбывацца ў гэты дзень. Калі гэта Дзень нараджэння, то ён павінен займець нейкія традыцыі, якія ўласцівыя і дню нараджэння чалавека.

Гэта:

— галоўныя колеры, якія ёсць у любога нацыянальнага свята, — белы і чырвоны паўсюль: ва ўбранні вуліц, крамаў, будынкаў, людзей;

— традыцыйныя элементы: людзі прыходзяць на працу ці ў госці ў строях з нацыянальным каларытам, збіраюцца ў кавярных ды рэстарацыях, дзе разам адзначаюць, гамоняць, спяваюць беларускія песні;

— святочныя паштоўкі, падарункі ў нацыянальным стылі, якімі беларусы віншуюць адзін аднога, віншуюць беларусаў людзі з розных куткоў свету, такі калектыўны дзень нараджэння для ўсіх — калі ты і імяніннік, і госць свята адначасова, і вакол усе такія;

— прэзентацыя новых прадуктаў: да гэтага дня розныя беларускія прадпрыемствы, вытворцы, выдавецтвы стараюцца прымеркаваць выпуск новага і цікавага, каб парадаваць, а можа і здзівіць беларусаў,

— вялікае штогадовае нацыянальнае свята ў Мінску і іншых гарадах Беларусі, задача якога — пазнаёміць беларусаў з дасягненнямі краіны ў розных сферах за год, з новымі і яскравымі ініцыятывамі, натхніць і заахвоціць.

Для свята я прыдумаў некалькі назваў, але можа быць і іншая:

Новая Беларусь — фестываль Беларусі новага стагоддзя,

Наша Ўсё! — паказаць беларускае самім беларусам,

Open Belarus — адкрыць і паказаць Беларусь.

Калі разважаць пра 2019 год, то для правядзення маштабнага свята ў Мінску я бачу дзве сукупныя лакацыі:

1. Палац спорту, пляцоўка перад Палацам спорту і «Галерэя Мінск»,

2. Арэна Мінск, пляцоўка перад Арэнай і канькабежны стадыён.

Калі наступная дата 25 сакавіка будзе прынятая выходным і святочным днём, то ўсе асноўныя мерапрыемствы адбудуцца без зменаў — 25-га. У іншым выпадку фестываль пройдзе 24-га сакавіка, а 25-га толькі вялікі вечаровы святочны канцэрт.

З чаго будзе складацца фестываль.

Калі пачаць падрыхтоўку ўжо з вясны 2018-га, то варта распланаваць шэраг разнастайных мерапрыемстваў з фіналам у сакавіку 2019-га.

Асноўныя складнікі фестывалю (кожным накірункам займаюцца прафесіяналы і практыкі ў гэтай сферы):

— Бізнес-форум — дыскусійная пляцоўка, дзе шчыра без пыхі адбываецца адкрытая размова пра дасягненні, праблемы і перспектывы Беларусі, 

— Мастацтва — прэзентацыя сучаснага і актуальнага візуальнага беларускага мастацтва,

— Музыка — дзве пляцоўкі: новае і актуальнае (цягам году ідзе конкурс у выніку якога лепшыя трапляюць у фінальны канцэрт), лепшае (святочны канцэрт з удзелам папулярных калектываў, гасцей і запрошаных зорак),

— Камунікацыйная пляцоўка — прэзентацыйныя стэнды розных культурных, грамадскіх і палітычных арганізацый, кірмаш ідэй, дзіцячыя пляцоўкі, кірмаш гатовых прадуктаў і г.д.

25 сакавіка можа ў будучым стаць яшчэ больш значнай датай у агульным штогадовым календары беларуса. Адметнай датай, з якой рэальна зрабіць і нацыянальны пазнавальны брэнд Беларусі ва ўсім свеце, як ірландскі Дзень святога Патрыка, як Казюкас у Літве, як Октоберфест у Германіі, як Свята красавання сакуры ў Японіі.

Безумоўна, што ў кожнага з гэтых святаў розная гісторыя, традыцыі і формы, але кожнае з іх з’яўляецца брэндам краіны, які папулярызуе яе традыцыі на ўвесь свет.

Вясновы час, калі прачынаецца пасля зімы прырода і зямля, час калі і сам беларус абуджаецца, мабыць, не выпадкова ў гэты час і была абвешчана незалежнасць БНР, якая і дала жыццё новай Беларусі.

Вось такая ідэя. Чакаю вашых каментароў, ідэй і развіцця тэмы.

Хочаш падзяліцца важнай інфармацыяй ананімна і канфідэнцыйна?