Руандыйцы кажуць «adieu» францускай

Урад Руанды — маленькай дзяржавы ў Цэнтральнай Афрыцы — пастанавіў перавесьці навучаньне ў школах з францускай мовы на ангельскую.

Таксама будзе пераведзена на ангельскую мову і праца дзяржаўных установаў.

Усе дзяржаўныя чыноўнікі цяпер абавязаныя вучыць ангельскую, але насельніцтва краіны — ад парлямэнтарыяў і таксістаў да студэнтаў і бізнэсоўцаў, кажуць, што француская мова — гэта мова бэльгійскіх калянізатараў, і таму яе эра павінна скончыцца.

Міністар адукацыі Руанды Тэонэст Муцідаш’яка зазначае:

«Паглядзіце: франкафонныя краіны — гэта цяпер толькі Францыя, частка Бэльгіі і Швайцарыі. Большая частка краін у сьвеце карыстаецца ангельскай, нават у Кітаі гавораць па-ангельску. У Бэльгіі, калі вы пераедзеце ў флямандзкія правінцыі, карыстаюцца ангельскай, але ні ў якім разе не францускай», піша Washington Post.

***

Руанда — невялікая дзяржава ў Цэнтральнай Афрыцы. Мяжуе з ДР Конга (былы Заір) на Захадзе, Танзаніяй — на ўсходзе, Угандай — на поўначы, і Бурундзі — на поўдні. Насельніцтва — 7,6 млн чалавек, тэрыторыя — 26.3 тыс. кв км). Сталіца — Кігалі.

У 1915 — 1962 г. — калёнія Бэльгіі.

Руанда стала сумнавядомай генацыдам 1994 году: масавых забойстваў тутсі і памераных хуту, якія ажыцьцявілі ваенізаваныя фармаваньні экстрэмістаў хуту «Інтэрахамвэ» і «Імпузамугамбі» пры актыўнай падтрымцы шараговых грамадзян і, кажуць, з маўклівага ведама ўладаў краіны.

Колькасьць забітых за 100 дзён перавысіла 800 тыс. чалавек.

Руандыйскі ўрад потым зьвінаваціў Францыю ва ўзбраеньні руандыйскіх фарміраваньняў, якія спрычыніліся да генацыду.

ул. інф.

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ