Раман Гладкі (злева) і Сяргей Гузееў на судзе
Гомельскі раённы суд 20 ліпеня абвясьціў вырак за «дзедаўшчыну» двум былым памежнікам Раману Гладкаму і Сяргею Гузееву, піша Радыё Свабода.
Яны прызнаныя вінаватымі ў гвалце, зьдзеку і жорсткім абыходжаньні з салдатамі, якія не падпарадкаваны ім па службе, і на падставе часткі 2, артыкулу 443 Крымінальнага кодэксу пакараны 2 гадамі і 6 месяцамі калёніі агульнага рэжыму.
Радавы Гладкі і яфрэйтар Гузееў служылі ў вайсковай частцы № 1242, на рэзэрвовай мабільнай заставе «Новая Гута». У судзе знайшлі пацьвярджэньне факты неаднаразовага зьбіцьця і зьдзеку над малодшымі салдатамі. Пацярпелымі прызнаны сямёра памежнікаў, пераведзеных сёлета служыць у Гомельскую памежную групу.