ФСБ паведаміла аб затрыманні ў Смаленскай вобласці ураджэнца Дагестана па падазрэнні ў членстве ў тэрарыстычнай групоўцы «Ісламская дзяржава» і ў тым, што ён па заданні СБУ планаваў забойства аднаго з лідараў самаабвешчанай Данецкай народнай рэспублікі.
Заданне забіць аднаго з лідараў ДНР яму далі ў Службе бяспекі Украіны і кіраўнікі «Правага сектара». Каго менавіта планаваў забіць затрыманы, не ўдакладняецца. ФСБ адзначае, мэтай Магамедава быў «камандзір аднаго з падраздзяленняў узброеных сіл ДНР, які пражывае ў Смаленскай вобласці».
Як сцвярджаюць у ФСБ, Магамедаў прызнаўся, што «на тэрыторыі Украіны нацыянальнымі спецслужбамі аказваецца актыўная дапамога» тэрарыстам ІД «у гарантаванні іх бяспекі, фінансаванні, прадастаўленні зброі і выбуховых рэчываў» для арганізацыі тэрактаў у Расіі. Таксама, па словах затрыманага, украінскія спецслужбы выкарыстоўваюць тэрарыстаў для «ліквідацыі лідараў апалчэння самаабвешчанай Луганскай і Данецкай народных рэспублік».
Пры вобшуку ў Магамедава знайшлі самаробнае выбуховае прыстасаванне магутнасцю 1,5 кілаграм у трацілавым эквіваленце, пісталет з прыстасаваннем для бясшумнай стральбы і боепрыпасы да яе. На яго завялі крымінальную справу.