Галоўнае ўпраўленне па барацьбе з арганізаванай злачыннасцю і карупцыяй (ГУБАЗіК) МУС Беларусі затрымала начальніцу ўпраўлення фармацэўтычнай інспекцыі і арганізацыі лекавага забеспячэння Міністэрства аховы здароўя Людмілу Равуцкую па падазрэнні ў атрыманні хабару.
Пра гэта TUT.BY паведаміла крыніца ў галіне і пацвердзілі ў ГУБАЗіК.
Заведзена крымінальная справа па артыкуле 430 Крымінальнага кодэксу — атрыманне хабару.
Нагадаем, што 29 жніўня Людміла Равуцкая ўдзельнічала ў брыфінгу, дзе тлумачыла сітуацыю з карэйскай вакцынай для немаўлят «Эўпента». Па яе словах у 2017 годзе ў Беларусі ўзнікла крытычная сітуацыя, звязаная з пастаўкай няякасных серый вакцыны расійскай вытворчасці АКДС.
Гэтыя серыі перыядычна бракаваліся і вярталіся пастаўшчыку. Сітуацыя пагражала не проста зрывам Нацыянальнага календара прышчэпак, але і масавым распаўсюджваннем небяспечных інфекцый.
Буйныя заходнія кампаніі, да якіх звярнулася Беларусь, адмовілі, бо не мелі дастаткова часу, каб вырабіць вакцыны. І тады Міністэрства аховы здароўя пачало выбіраць паміж вакцынамі вырабу Індыі, Кітая і Паўднёвай Карэі. У выніку ўзялі карэйскую, «Эўпента» — незарэгістраваную.
13 жніўня ў Ганцавіцкім раёне двухмесячны хлопчык памёр пасля прышчэпкі. 14 жніўня дзяўчынка такога ж узросту трапіла ў рэанімацыю пасля планавай прышчэпкі. Пазьней стала вядома, што ў траўні пасьля прышчэпкі «Эўпенты» памерла чатырохмесячная дзяўчынка.