У справе аб атручванні былога расійскага ваеннага разведчыка Сяргея Скрыпаля і яго дачкі Юліі з'явіўся трэці падазраваны, паведамляе «Фонтанка».
Калаж: Фонтанка.
Паводле крыніц выдання, улады Вялікабрытаніі гатовыя аб'явіць саўдзельнікам Мішкіна і Чапігі 45-гадовага Сяргея Фядотава.
Фядотаў у студзені-лютым 2014 года ездзіў у Чэхію. У гэты час, паводле Чэшскага радыё, «Пятроў» і «Башыраў» шпіёнілі за Скрыпалём у Празе.
Фядотаў таксама наведваў Кіеў, Мілан, Жэневу і Лондан. У Вялікабрытаніі ён быў тройчы — у сакавіку 2016 года, сакавіку 2017 года і сакавіку 2018 года. Апошні раз ён прыехаў у Вялікабрытанію 2 сакавіка, як і «Пятроў» з «Башыравым», але іншым рэйсам, а паляцеў назад 4-га, у дзень замаху, разам з імі.
Таксама расійскае выданне паведамляе, што Фядотаў, «Башыраў» і «Пятроў» падчас замежных паездак карысталіся пашпартамі 64-й серыі з блізкімі нумарамі, што ўскосна даказвае сувязь з ГРУ.
