Арганізатары першай прэміі музычнага відэа кажуць, што сярод прэтэндэнтаў на перамогу кліпаў гурта «Ляпіс Трубяцкой» ня будзе: «Сярод галоўных крытэраў адбору ў нас ня толькі прафэсіяналізм рэжысэра, але яшчэ і беларускамоўнасьць выканаўцы. Калі «Ляпіс« здыме відэа на беларускамоўны трэк — будзем толькі радыя і пакажам на наступных фэстывалях».
Арганізатары першай прэміі музычнага відэа «Кліп‑марафон‑2008» разглядаюць сваю задуму, як беларускі аналяг такіх фэстываляў, як Vimus у Партугаліі і MTV Video Music Awards. Ідэя паўстала ў 2007 годзе. Тады шэраг маладых людзей зладзілі невялічкі фэстываль і ўбачылі, што ўдзельнікам і гледачам гэтая ідэя спадабалася, таму вырашылі зрабіць першую музычную прэмію ўжо на большым узроўні. Сёлетнюю імпрэзу яны прысьвячаюць 20‑годзьдзю беларускага кліпа на песьню «Ўра» гурта «Бонда» рэжысэра Генадзя Шувагіна. Цікава, што сярод галоўных крытэраў, па якіх вызначаюцца ўдзельнікі прэміі — ня толькі прафэсіяналізм рэжысэра, але і беларускамоўнасьць выканаўцы. Так што, як кажа арганізатар «Кліп‑марафона» Міхал Нядзьвецкі гурту «Ляпіс Трубяцкой» зь ягоным «Капиталам» ды «Огоньками» сёлета нічога ня сьвеціць: «Калі «Ляпіс« здыме відэа на беларускамоўны трэк — будзем толькі радыя і пакажам на наступных фэстывалях».
Паводле задумы сёлета будуць разглядацца толькі ролікі, зробленыя цягам 2007—2008 гадоў. Удзельнічаюць гурты Neuro Dubel, «Крамбамбуля», Tarpach, «Палац», ZET, «Крама», IQ48, :B:N:, Mauzer ды іншыя. Усе працы будуць разьбітыя па намінацыях («Лепшая анімацыя», «Лепшы пэрформанс» ды г. д.). Плянуецца, што ў шэрагу намінацыяў пераможца будзе абраны паводле глядацкага галасаваньня проста падчас цырымоніі. Сваіх фаварытаў назаве і журы, у склад якога ўвойдуць абазнаныя ў відэамастацтве адмыслоўцы — стваральнік першага беларускага 3D‑кліпа Аляксей Несьцераў, спэцыяліст па кліпмэйкінгу Павал Сьвярдлоў, прадусар Ігар Знык, запрашэньні таксама атрымаюць режысэр Анатоль Вечар і прадусар MTV у Беларусі Валік Грышко.
Першая штогадовая прэмія беларускага музычнага відэа «Кліп‑Марафон‑2008» адбудзецца 14 сьнежня ў 18:00 у менскім клюбе «Акварыюм».
