Стаяць на сваім: у Мінску зноў пройдзе кінафестываль Watch Docs Belarus

WATCH DOCS Belarus традыцыйна ўтульна ўладкоўваецца ў шчыльнай снежаньскай афішы. 13—16 снежня мінчане і госці сталіцы будуць мець магчымасць пабачыць не толькі наймацнейшыя дакументальныя фільмы пра правы чалавека, але і паразмаўляць з рэжысёрамі фільмаў і іншымі гасцямі фестывалю. А яшчэ можна будзе скласці жартаўлівы рэйтынг самых бяздумных рашэнняў чыноўнікаў за апошні год. У праграме фестываля 15 кінастужак, якія пакажуць у кінатэатры «Мір» і на пляцоўках ОК16, PR3.

Фестываль, які з’явіўся з мэтай гаварыць пра правы чалавека на мове асабістых і аўтарскіх гісторый, прадстаўляе фільмы з розных куткоў свету. Героеў кінастужак — сапёра-дабраахаотніка з пасляваеннага Іраку, зняволенных жанчын беларускай турмы, шведскую рэп-спявачку Сільвану, вулічных музыкаў Буркіна-Фасо і Нобелеўскага лаурэата прэміі міра — аб’ядноўвае слоган фестываля «Стаяць на сваім». Моц і слабасць такой пазіцыі фестываль прапаноўвае «разглядзець» як на саміх кінапраглядах, так і падчас спецыяльных мерапрыемстваў з удзелам экспертаў.

«Права на чалавечую годнасць — гэта ў тым ліку імкненне адстаяць сваё «Я». Аднак абарона сваіх перакананняў, правоў і межаў — тэма адвечнага пошуку баланса ў свеце чалавечых адносінаў. На якой менавіта праўдзе «стаяць», кожны выбірае сам па прычыне самых розных абставінаў, але навучыцца ў гэтай барацьбе паважаць і чуць іншых — адна з задач нашага фестываля. Мы запрашаем да ўдзелу людзей з рознымі пазіцыямі і, магчыма, мы здаемся адзін аднаму апанентамі толькі таму, што ніколі не мелі магчымасці пагаварыць,» — кажа дырэктар фестываля Таццяна Яворская.

Тэма фестываля раскрывацца праз некалькі ракурсаў:

Стаяць на сваім: Невуцтва і ксенафобія

13 снежня ў 18:30 у кінатэатры «Мір» фестываль адкрые фільм «Белы свет вачыма Даліборэка» — рэдкі і вельмі паспяховы прыклад дакументальнай камедыі. Чэшскі рэжысёр Віт Клусак адпраўляе гледача ў замкнутае кола роздумаў пра тое, якім жудасным можа быць нацызм у сваёй жывучасці, і які нацызм смешны, калі пабачыць рэальнае жыццё тых, у чыі галовы ён пракрадаецца.

Стаяць на сваім: Хлусня, нахабная хлусня

На аснове фільма Максіма Паздароўкіна «Наш новы прэзідент» адбудзецца дыскусія пра фэйкі ў СМІ, постпраўду, прапаганду і пра інфармацыю, якая робіць нас яшчэ больш уразлівымі. Партнёр і месца правядзення прагляду - Press Club Belarus.

Стаяць на сваім: Глеба, якой няма пад нагамі

Тут каманда WATCH DOCS прапаноўвае адразу тры нагоды пагаварыць адкрыта:

— рэсацыялізацыя былых асуджаных. Размаўляем спачатку з экспертамі пасля прагляду фільма «Унутраная работа», затым разам з рэжысёрам Анастасіяй Мірашнічэнка і гераінямі фільма «Дэбют»(пра жаночую гомельскую калонію);

— эмацыйнае выгаранне, дэпрэсія, сіндром хранічнай стомленасці: калі ўжо час звярнуцца за дапамогай? Гаворым з экспертамі пасля фільма Джэніфер Бреа «Неспакой»;

— інтэграцыя людзей са слабым слыхам; чаму мы не разам? Дакументальная гісторыя «Глухое дзіця» працягнецца дыскусіяй з экспертамі.

Стаяць на сваім: Захоўваючы здаровы сэнс

Гэтай тэмай аб’яднаныя фільмы, якія дапамогуць вам пабачыць, што нашая планета і сёння ўсыпаная плямамі жаху, падобнага на Халакост і, нажаль, нават страшнейшага. Сярод самых уражваючых фільмаў WATCH DOCS 2018: стужкі «Мужчына, які рамантуе жанчын» гісторыя пра вайну, у якой жанчыны становяцца зброяй і полем бою, і «Трап у будучыню» — сучасная адысея пра выратаванне тапельцаў у моры паспяховай абыякавасці. З рэжысёрам апошняга фільма, Рэнэ Хэйзкампам, гледачы абмяркуюць адносіны еўрапейцаў і беларусаў.

Спецыяльныя госці фестывалю:

Адам Міхнік — польскі грамадскі дзеяч, дысідэнт, журналіст, паказальная асоба ў польскай палітычнай апазіцыі 1968—1989 гадоў, адзін з лідараў прафсаюза «Салідарнасць». Заснавальнік і глаўны рэдактар «Газеты Выборчай». Разам з ім на сустрэчу з гледачамі прыедзе рэжысёр фільма пра Адама Міхніка Марыя Змаж-Качановіч.
Лоўрэнс МакКёун, былы добраахвотнік ІРА, за што ў 1997 годзе быў асуджаны да пажыццёвага зняволення (памілаваны ў 1992), удзельнік «Коўдравага» і «Бруднага» пратэстаў, галадоўкі 1981 года. Зараз ірландскі пісьменнік, драматург, сцэнарыст. Галоўная тэма яго прац — асэнсаванне канфлікту ў Паўночнай Ірландыі.

Глядзім разам фільмы «Мурэйд Фэрэл: няскончаная размова» і «Міхнік: Будзь рэалістам, патрабуй немагчымага!» і размаўляем з імі пра імкненне вярнуць сабе тое, што павінна належаць табе ці твайму народу па праву нараджэння і пра пачуццё абавязку, якое становіцца асабістым «крыжам».

Усе фільмы транслююцца з субтытрамі (на рускай ці беларускай мове), таму дасяжныя для людзей з абмежаваннямі слыху.

Праваабарончая навінка 2018 года — антыпрэмія «WATCH DOCS пазначыў»

Да 10 снежня арганізатары фестываля збіраюць намінантаў, якія знервавалі і засмуцілі беларусаў на працягу года. Даведацца пра крытэры і пакінуць сваю прапанову можна на сайце WATCH DOCS. Каманда фестываля сфармуе спіс прэтэндэнтаў, а гледачам можна будзе прагаласаваць за шорт-ліст падчас праглядаў кіно. Пераможцы будуць абвешчаны падчас урачыстага закрыцця фестываля.

Уваход на ўсе падзеі ў межах WATCH DOCS Belarus традыцыйна і прынцыпова свабодны (для фундатараў фестываля арганізатары рэзервуюць месцы). Пляцоўкі фестываля: кінотэатр «МІР«, культурны хаб ОК16 і PR3. Больш пра праграму тут.