Галоўная рэдактарка «Новага часу» Аксана Колб, адвакатка Марыя Колесава-Гудзіліна і юрыст БАЖ Алег Агееў. Фота ПЦ «Вясна»
Агучана рашэнне суда Савецкага раёна Мінска паводле бізнэсоўца Леаніда Зайдэса да газеты «Новы Час» і журналіста Дзяніса Івашына, піша baj.by.
Пазоў Леніда Зайдэса задаволены часткова:
«Новы час» абавязаны сплаціць Зайдэсу 700 рублёў маральнай кампенсацыі і судовыя выдаткі. Акрамя таго, «Новы час» павінен апублікаваць абвяржэнне свайго матэрыялу.
Журналіст Дзяніс Івашын не мусіць плаціць кампенсацыю Зайдэсу.
Прэтэнзіі бізнэсмэна тычыліся двух артыкулаў: у адным матэрыяле газета напісала, што кампанія Зайдэса «мае дачыненне да незаконнага будаўніцтву рэстарана «Паедзем, паядзім», у другім — што ва Украіне на Зайдэса была заведзена крымінальная справа.
І тое, і іншае Зайдэс патрабаваў абвергнуць. Акрамя таго, у сваім пазове бізнэсмэн патрабаваў выплаціць яму маральную кампенсацыю ў памеры 8 тысяч рублёў: 5 тысяч ад рэдакцыі, 3 — ад аўтара артыкулаў Дзяніса Івашына.
Адвакат бізнэсмэна Яўгенія Патапава прадаставіла суду даведку з МУС Украіны аб тым, што Зайдэс да крымінальнай адказнасці там не прыцягваўся.
Пасля рашэнне суда кіраўніцтва газеты заявіла, што будзе падаваць апеляцыю, піша Tut.by.