Спікеры парламентаў Абхазіі і Паўднёвай Асеціі разлічваюць на прызнанне Беларуссю незалежнасці рэспублік.
Пра гэта Нузгар Ашуба і Знавур Гасіеў заявілі 16 снежня ў Мінску, адказваючы на пытанні журналістаў. Сёння ў якасці назіральнікаў яны ўдзельнічаюць у працы 35‑й сесіі Парламенцкага сходу Беларусі і Расіі.
«Прызнанне незалежнасці — гэта справа беларускага парламента, прэзідэнта, народа. Мы верым у нашу дружбу. Думаю, што рана ці позна прызнанне будзе», — заявіў спікер парламента Абхазіі. Ён лічыць, што рашэнне аб прызнанні рэспублік не стане прадметам торгу паміж Усходам і Захадам для Беларусі. «Палітыка заўсёды звязана з інтарэсамі. У Беларусі ёсць інтарэсы і на Захадзе, і на Усходзе. Упэўнены, яна прыме максімальна выверанае рашэнне», — сказаў Н.Ашуба.
Ён паведаміў, што пакуль ад беларускага боку ніякіх гарантый аб прызнанні незалежнасці рэспублік не было. «Пэўныя размовы былі, але іх змест я не хацеў бы агучваць», — зазначыў абхазскі палітык.
Нузгар Ашуба заявіў, што рэспублікі «нікуды не спяшаюцца».«Мы прынялі рашэнне аб незалежнасці не на год‑два, а навечна. Працэс прызнання Абхазіі і Паўднёвай Асеціі пайшоў і яго немагчыма спыніць», — лічыць ён.
Спікер парламента Абхазіі разлічвае на ўступленне рэспублік у склад Саюзнай дзяржавы. «Саюзная дзяржава нам дасць вельмі шмат. Нашы народы перажылі складаны перыяд. Прызнанне Расіяй забяспечыла бяспеку нашых грамадзян — прызнанне незалежнасці Беларуссю і ўступленне ў Саюзную дзяржаву пашырыць і ўмацуе нашу бяспеку», — падкрэсліў ён.
