Упраўленне КДБ па Гомельскай вобласці 18 снежня адкрыла свой музей.
Як паведамілі БелаПАН у прэс‑групе УКДБ, падзея прымеркаваная да прафесійнага свята — Дня супрацоўніка органаў дзяржбяспекі, які адзначаецца 20 снежня. Канцэпцыю музея распрацавалі і ўвасобілі ў жыццё дызайнеры Святлана Наздрын‑Платніцкая і Мікалай Шкляраў.
Каб стварыць панараму падзей з 1917 года да нашых дзён, памяшканне асаблівым чынам рэканструявалі. У музеі выдзелена некалькі перыядаў, кожнаму з якіх адпавядае сваё колеравае рашэнне і напаўненне, што перадае яго характэрныя асаблівасці і атмасферу.
Паводле слоў супрацоўнікаў прэс‑групы, наведнікам адкрываюцца яркія моманты аператыўна‑службовай дзейнасці гомельскіх чэкістаў.
У раздзеле «Служым Рэспубліцы Беларусь» праз рассакрэчаныя дакументы, фотаздымкі і іншыя экспанаты расказваецца пра дзейнасць супрацоўнікаў УКДБ па супрацьдзеянні замежным спецслужбам, барацьбе з тэрарызмам, раскрыцці злачынных груп і арганізацый на сучасным этапе.
Палкоўнік КДБ у адстаўцы Мікалай Тарасаў, які 46 гадоў адслужыў у органах бяспекі, паведаміў БелаПАН, што ідэя стварэння ўласнага музея ва ўпраўленні нарадзілася яшчэ ў 60‑х гадах.
У той час ва ўпраўленні дзейнічаў «Пакой баявой чэкісцкай славы».
«Першапачаткова экспанатаў было мала — некалькі фотаздымкаў, зброя, канфіскаваная ў пасляваенны перыяд ва ўсялякіх груп і асоб», — зазначыў І.Тарасаў. У 1972 годзе ён быў абраны сакратаром партыйнага бюро ўпраўлення, па даручэнні кіраўніцтва разам з калегамі заняўся стварэннем своеасаблівай экспазіцыі, якую назвалі «Чэкісцкі пакой славы» і адкрылі ў 1973 годзе.
Сучасны музей, на думку М.Тарасава, будзе адыгрываць вялікую ролю ў выхаванні маладых чэкістаў. «І школьнікаў прыводзіць будуць сюды, напэўна, і нам, ветэранам, варта будзе паглядзець, наведаць музей, успомніць», — сказаў ветэран КДБ.
М.Тарасаў, паводле яго слоў, непасрэдна ўдзельнічаў у раскрыцці банды Ўладзіміра Юхневіча, якая дзейнічала ў Жыткавіцкім раёне каля пяці гадоў і трымала ў напружанні вёскі Кольна, Млынок і Рудню. Бандыты падпальвалі дамы, узарвалі дом участковага міліцыянера, у 1962 годзе — будынак міліцыі і пракуратуры. Потым У.Юхневіч быў прыгавораны да расстрэлу, а яго саўдзельнікі — да вялікіх тэрмінаў зняволення.